Elimizde derttiń alǵashqy deregi bilingennen-aq onyń jalpaq jurtqa jaıylyp ketpeýi úshin qam jasaldy. Degenmen de, qazir biraz óńirde vırýsqa shaldyqqandar qatary kóbeıip keledi. Mysaly, eki apta ishinde Syr boıynda olardyń sany 116 adamǵa jetýi kimdi de oılantýy tıis jaǵdaı.
Jergilikti bılik der kezinde shekteý sharalaryn qolǵa alyp, oblys ortalyǵy men aýdandar, keıbir eldimekender karantınge jabyldy. Oblys aýmaǵynda kólik qozǵalysy shekteldi, taksı qyzmeti toqtatyldy, turǵyndarǵa ózderi turatyn úı mańaıynan uzap shyqpaý qajettigi eskertildi. Tipti, oblystyń bas sanıtarlyq dárigeriniń №8 qaýlysymen barlyq qurylys jumystary toqtatylyp, oblys ortalyǵyndaǵy qoǵamdyq kólik qyzmetiniń júrý ýaqyty shekteldi. Osylaısha bılik vırýstyń taralýyn tejeýdiń barlyq amalyn jasady, endi tek turǵyndar azamattyq jaýapkershilik tanytýy kerek. Sonda ǵana indettiń quryǵyna ilingender qatary kún saıyn kemı bermek.
Osyǵan baılanysty oblys ákimi Gúlshara Ábdiqalyqova aımaq halqyna úndeý jarııalady. Oblys basshysy problemanyń shyn máninde alapat ekenin áli de bolsa túsine almaı otyrǵanymyzdy atap ótken.
Aımaq boıynsha vırýspen kúreske medısına salasynyń 3 myńǵa jýyq qyzmetkeri jumyldyrylǵan. Tosqaýyl beketterinde 200 polıseı men 170 áskerı qyzmetker úzdiksiz kezekshilik etip tur.
Biraq, ómirin qaterge tigip, eldi qaýipti indetten arashalap qalýdyń qamymen júrgen osy azamattardyń eńbegin eskerip jatqandar az sııaqty. Mysaly, qazir kóshede júrgen adam da, kólik te kóp. Bul talaptyń tolyq oryndalyp jatpaǵandyǵyn kórsetedi. Qala men eldimekenderdegi tosqaýyl beketterin de aınalyp ótýge tyrysýshylar da az emes ekendigi baıqalyp qalady. Oǵan mysal, 11 sáýir kúni bolǵan jaǵdaı. Osy kúni reıdke shyqqan «Ohotzooprom» О́B» RMQK Qyzylorda óńirlik fılıalynyń ınspektorlary qalaǵa taıaý Dosan aýylynyń mańynda kúdikti kóringen eki kóliktiń sońyna túsedi. Inspektorlardan qashyp, aýdarylǵan kólik ishinen múıizi kesilgen 54 kıik, 224 dana múıiz, 25 oǵy bar MR-153 markaly ańshy myltyǵy, dúrbi men pyshaq tabyldy. Ekinshi kólikke aýysyp mingen brakonerler qutylyp ketti. Qazir karantın kezinde jan-jaǵy qymtalǵan qaladan sytylyp shyǵyp, talaı janýardy oqqa baılaǵan brakonerler izdestirilýde. Kúni-túni adam ómiriniń saqshysy bolyp júrgen dárigerdiń, táýlik boıy qoǵamdyq tártipti saqtaıtyn polıseıdiń, oblys ortalyǵy men aýyl-aýyldy aralap, juqpaly kesel oshaǵyn zalalsyzdandyryp júrgen áskerılerdiń eńbegin baǵalasaq, mundaı qadamǵa barmas edik-aý.
Gúlshara Naýshaqyzy úndeýde jurttyń óz betinshe oqshaýlanyp, úıden shyqpaı, jaqyndarymen júzdesýden ýaqytsha bas tartýy koronavırýspen kúreske qosqan úlken úles ekenin atap ótedi. Aımaq basshysynyń áleýmettik jelidegi paraqshasyna kóptegen mańyzdy ári mazmundy usynystar túsip, olar boıynsha tıisti oryndarǵa tapsyrmalar berilipti.
Turǵyndarǵa arnaǵan úndeýinde oblys ákimi halyqpen keri baılanystyń mańyzdylyǵyna nazar aýdaryp, árbir pikir eskerýsiz qalmaıtyndyǵyn jetkizedi.
Bul indet bizdiń eldigimiz men birligimizdi synaıtyn sát bolyp tur. Al ol úshin eń aldymen árbir turǵyn azamattyq jaýapkershilikti sezine bilýi kerek.