Bıylǵy jyly uly aqyn Abaı Qunanbaıulynyń 175 jyldyǵy respýblıka kóleminde atalyp ótilýde. Osyǵan oraı, oblystyq halyq shyǵarmashylyǵy ortalyǵy da óz úlesin qosyp, «Dara - Abaı, dana - Abaı» jazba aqyndar arasynda respýblıkalyq onlaın aqyndar aıtysyn ótkizbekshi.
Al, jyrsúıer qaýym jarys barysyn bastan-aıaq oblystyq halyq shyǵarmashylyǵy jáne demalys ortalyǵynyń áleýmettik jelilerdegi Facebook, Instagram paraqshalarynan tamashalaı alady. Onlaın-aıtystyń ózine tán erekshelikteri men qıyndyqtary bar. Ásirese jazba aqyndar úshin bul tyń dúnıe. Biraq, osyndaı ýaqytsha qıyn tusta eldiń eńsesin tiktep, halyqtyń rýhyn kóterýge arnalǵan dúnıege aqyndar belsene atsalysýda. Olarǵa qoıylatyn basty talap – uly oıshyldyń ádebı muralary men qazaq rýhanııatyna arnaǵan shyǵarmalaryn tilge tıek etý. Sonymen qatar, el ishindegi ótkir máselelerdi de otty jyrlaryna qosa otyryp, qarsylasymen sóz qaǵystyrý. Al, aıtysqa qatysamyn degen aqyndardyń jasyna shekteý qoıylmaıdy. Jyr báıgesi 3 kezeńnen turady. Alǵashqy kezeńde aqyndar qarym-qabiletine qaraı irikteledi. Odan soń jartylaı aınalymda juptasyp aıtysady. Osy eki kezeńnen súrinbeı ótken aqyndar maýsym aıynda ótetin aqtyq synda baq synaıdy. Qazirgi kezde aqyndardy irikteý kezeńi ótýde.
– Qazirgi ýaqytta aqyndardyń ótinimderin qabyldap jatyrmyz. Irikteý kezeńinen ótken aqyndardy juptaımyz. Olarǵa aldyn-ala habarlanady. Eki aqynǵa bir táýlik ýaqyt beriledi. Sol ýaqyt ishinde olar bir-birimen jaýaptasyp aıtysý kerek. Eger de qandaı da bir jaǵdaıǵa baılanysty aqynǵa jaýap berilmeı keshigip jatsa jeńildi dep esepteledi. Olarǵa jergilikti aqyndar men ádebı synshylar qazylyq etedi. Bul aıtystyń ótýine birinshiden oblystyq mádenıet, arhıvter men qujattamalar basqarmasy qoldaý tanytty,–deıdi oblystyq halyq shyǵarmashylyǵy jáne mádenı demalys ortalyǵynyń kórkemdik jetekshisi Toqtarbek Qaldyrbaev.
Aıtystyń qyzyǵyn onlaın arqyly da qyzdyrýǵa bolady eken.