Prezıdent Q.Toqaev tarapynan aýylsharýashylyq salasyna, taýar óndirýshilerge qoldaý kórsetý týraly naqty tapsyrmalar júktelýde. Memleket basshysynyń bastamasymen qolǵa alynǵan sharalar qazirgideı kúrdeli kezeńde agrarlyq salanyń eńsesin túsirmeýge kómektesetini sózsiz.
Jalpy, elimizde jáne álemniń kóptegen elinde jarııalanǵan tótenshe jaǵdaı adamǵa eń birinshi ne kerek ekenin kórsetti, shynaıy qundylyqtardyń baǵasyn arttyrdy dep oılaımyn. Birinshiden, adam balasyna eń keregi – densaýlyq. Odan keıingi qajeti – kúndelikti azyq-túligi. Al aýyl sharýashylyǵy – halyqtyń osy eki qajettiligin de óteıtin sala. Sebebi sapaly ári mol, baǵasy tıimdi azyq-túlik densaýlyqtyń jaqsy bolýyna tikeleı áser etedi. Eldiń ekonomıkasy durys bolsa, halyqtyń ál-aýqaty artady, áleýmettik jaǵdaıy jaqsarady.
Memleket basshysy kóktemgi dala jumystary kesheýildep qalmaýy úshin jalpy kólemi 170 mlrd teńgeden astam qarjy bólgizdi. Dızeldik otyn baǵasy da jyldaǵydan áldeqaıda arzanǵa jetkizilip jatyr. Egis alqaptarynda jumys qyzdy. Astyq daqyldaryn, baý-baqsha ónimderin aıtpaǵanda, 300 myń gektardan astam jerge mal azyǵy daqyldary egiletin boldy.
Jalpy, qaýymdastyq músheleriniń, fermerlerdiń atynan tótenshe jaǵdaıǵa baılanysty qolǵa alynǵan shekteýlerdi tolyq qoldaımyz. Fermerlerdiń jumysy karantın talaptarymen jan-jaqty úılestirilgen. Jumys babymen júrip-turý qajet bolǵan jaǵdaıda fermerler tıisti ruqsat qaǵazyn qoldanady.
«Kóktemniń bir kúni – jylǵa azyq» deıdi babalarymyz. Der kezinde jasalǵan qoldaýdyń nátıjesinde kóktemniń ár kúni tıimdi paıdalanylyp jatyr. Sátin salsa, kóp uzamaı karantınniń de aıaqtalyp, elimizdiń ómiri burynǵy arnasyna qaıta túsedi. Kóktemde jasalǵan sharýalardyń mol jemisin kúzgi salym kóremiz degen senimdemin.
Almasbek SADYRBAEV,
Qazaqstannyń «Shopan-ata» ulttyq qoıshylar qaýymdastyǵynyń basqarma tóraǵasy