Naýryzdyń 31-i kúni Batys Qazaqstan oblysy aýmaǵynda kúshine engen kúsheıtilgen karantın rejiminde Oral qalasyna kirip-shyǵýdy shekteý sharalaryna ózgeris engizildi. Bul týraly qala ákimi Abat Shynybekov habarlady.
«Batys Qazaqstan oblysy jedel shtabynyń sheshimimen turǵyndarymyzǵa tolyq aqparat beretin, karantın kezinde oryndalýy tıis tártip pen nuqsaýlyqtar, turǵyndarymyz eń qajetti fýnksııalardy júzege asyratyn www.stopcovid.kz veb-saıty iske qosyldy. Bul biryńǵaı júıeli elektrondy baza arqyly qyzmet aıasy shektelgen kásiporyndardyń ótinishteri tirkelip, jumys isteýge ruqsat ala alady jáne qajetti málimetter bazasy blok-beketterge beriledi. Bul saıtty iske qosý arqyly biz kóptegen kásiporyndardyń óz tanystary men týystaryna anyqtama alyp berý sııaqty zańsyzdyqtardyń jolyna tosqaýyl qoıa aldyq. Kúsheıtilgen karantın kezinde qalaǵa kirip-shyǵýdy shekteý sharalary turǵyndarymyzdyń densaýlyǵy men qaýipsizdigin saqtaýǵa baǵyttalyp otyr» dedi qala ákimi.
Stopcovid.kz saıtyna 8 sáýirden búgingi kúnge deıin 7 338 uıym men kásiporynnan suranys kelip túsken. Solardyń ishinde 1732 ótinish maquldanyp, 1959 ótinishten bas tartylǵan. Bul ótinishter salalyq basqarmalar arqyly jiti zerdelenip, qorytyndylar berilýde.
Batys Qazaqstan oblysynyń Bas memlekettik sanıtarııalyq dárigeriniń qaýlysyna sáıkes Oral qalasy aýmaǵyndaǵy kireberisterinde 9 blok-beket ornatylǵan bolatyn. Qazir oblystyń barlyq aýdandarynan blok-beketten ótýge ruqsat berilgen 2114 tizim bar. Olar negizinen aýyl dúkenderine azyq-túlik tasıtyn, basqa da kúndelikti tirshilikti qamtamasyz etetin tulǵalar. Qala mańynda turatyn turǵyndar da blok-beketten jumys ornynan berilgen anyqtamaǵa sáıkes ótedi.
Batys Qazaqstan oblysy Reseı Federasııasymen shekarada turǵandyqtan, tranzıttik júk kólikteri de aǵylyp jatqany belgili. Olardyń Oral qalasy aýmaǵynan toqtaýsyz ótýin jol polısııasy patrýlin qadaǵalaıdy. Iаǵnı qala aýmaǵyndaǵy 9 blok-bekettiń mańyna 10-20 tranzıttik júk kóligin toptap jınap alyp, kolona tártibimen jol polısııasy patrýli aldy-artynan júrip otyryp, kelesi blok-beketten toqtaýsyz ótkizip jiberedi. Olardyń jergilikti turǵyndarmen, basqa adamdarmen qarym-qatynasy shektelgen.
Sondaı-aq 8 sáýirden bastap Oral qalasyndaǵy kúsheıtilgen karantın rejiminiń tártibin saqtaý maqsatynda turǵyndardyń qala ishinde jeke kólikterimen saǵat 21:00-den 6:00-ge deıin qozǵalysy shekteldi.
Al karantın kezinde qala turǵyndaryna qala ishindegi jáne syrtyndaǵy saıajaılarǵa senbi jáne jeksenbi kúnderi barýǵa ruqsat etildi. Oral qalasy aýmaǵynda 176 baý-baqsha seriktestigi ornalasqan, onyń ishinde 20 myńdaı telim turaqty paıdalanýda. Baý-baqsha seriktestiginde 5,8 myń otbasy, ıaǵnı 18 myń adam turaqty turyp jatyr. Olar óz otbasy músheleriniń tynys-tirshiligin qamtamasyz etý úshin qajettiligine qaraı ruqsat etilgen saǵattarda kún saıyn qozǵalýǵa quqyly.
Batys Qazaqstan