Prezıdent janyndaǵy Ortalyq kommýnıkasııalar qyzmetiniń alańynda Aqparat jáne qoǵamdyq damý mınıstrligi Din isteri komıtetiniń tóraǵasy Erjan Núkejanov, Qazaqstan musylmandary dinı basqarmasynyń tóraǵasy, bas múftı Naýryzbaı Qajy Taǵanuly, Orys pravoslav shirkeýiniń mıtropolıttik okrýginiń basshysy, Astana jáne Qazaqstan Mıtropolıti Aleksandr tótenshe jaǵdaı kezinde dinı is-sharalardy ótkizý barysy týraly baspasóz máslıhatyn ótkizdi.
«3 sáýirde Aqparat jáne qoǵamdyq damý mınıstri Dáýren Abaev arnaıy brıfıng ótkizip, din salasyndaǵy azamattarǵa, el halqyna, dinı birlestikterge ustanymdaryn aıtqan bolatyn. Bul ustanymdar boıynsha jalpy dinı rásimderdi ótkizý kezinde halyqty kóp jınamaý, sondaı-aq turǵyndarǵa aqparatty berip turý úshin onlaın formatyn engizý usynylǵan edi. Qýantarlyq jaǵdaı, elimizdegi barlyq dinı uıymdar tarapynan bul usynystar qoldaý taýyp jatyr», dedi Din isteri komıtetiniń tóraǵasy Erjan Núkejanov.
Bas múftı Naýryzbaı Qajy Taǵanuly qazaqstandyqtardy kelip jetken Ramazan aıymen quttyqtaı kele, azamattardy tótenshe jaǵdaı sharttaryna túsinistikpen qaraýǵa jáne dinı merekelerdi toılaý kezinde barlyq karantındik sharany saqtaýǵa shaqyrdy. Sonymen qosa din qyzmetkerleri karantın kezinde 17 643 otbasyna kómek kórsetkenin, 47 821 betperde taratylǵanyn málimdedi.
Brıfıngte QMDB tótenshe jaǵdaı kezinde onlaın-ýaǵyzdar men dáristerdiń arnaıy kestesin bekitkeni belgili boldy. Sondaı-aq azamattarymyzdy qyzyqtyratyn barlyq suraqqa jedel jaýap berý úshin call-ortalyq iske qosylǵany aıtyldy.
«Ulttyq ǵaryshtyq zertteýler men tehnologııalar ortalyǵy» mekemesiniń ǵylymı málimetine súıenip, sondaı-aq kórshi О́zbekstan jáne Qyrǵyzstan musylmandary dinı basqarmalarymen keńesip, Ramazan aıynyń bastalatyn kúni belgilendi. Sharıǵat úkimi men ǵylymı zertteý jumysynyń qorytyndysyna sáıkes, musylmandar asyǵa kútetin Ramazan aıy bıyl elimizde 24 sáýir kúni bastalatyn boldy», dedi bas múftı.
Osy oraıda ol sharıǵat boıynsha balıǵatqa tolǵan, aqyl-esi durys árbir musylmanǵa Ramazan aıynda oraza ustaý paryz ekenin eske saldy. «Alaıda jolaýshylarǵa, syrqattanǵan nemese densaýlyǵy nashar adamdar aýrýynyń asqynýynan qaýiptense jáne dáriger uzaq ýaqyt boıy ashyǵýdan densaýlyǵy kúrt nasharlap ketýi múmkin degen sheshim qabyldasa, sondaı-aq júkti nemese omyraýda balasy bar áıelderge oraza tutýdy keıinge qaldyrýǵa sharıǵat mursat beredi», dedi Naýryzbaı qajy Taǵanuly.
Qazaqstan musylmandary dinı basqarmasynyń basshysy elimizdegi tótenshe jaǵdaıǵa baılanysty qasıetti Ramazan aıynda indettiń taralýynyń aldyn alý maqsatynda karantın merziminde Taraýyq namazy meshitterde jamaǵatpen oqylmaıtynyn málimdedi. «Taraýyq namazyn árkim óz shańyraǵynda otbasy múshelerimen oqýyna keńes beremiz. Biz osylaı oqshaýlaný arqyly juqpaly indetti jeńemiz», dedi Naýryzbaı qajy.
Sonymen qatar bas múftı karantın kezinde aýyzashar berilý barysyn túsindirdi. «Juqpaly indettiń taralýynyń aldyn alý maqsatynda meshitterde, dámhanalarda, qoǵamdyq oryndarda jáne basqa da mekemelerde jınalyp aýyzashar berýdi ýaqytsha toqtatýǵa shaqyramyz. Sondyqtan karantın kúnderi árkim óz shańyraǵynda aýyzashar ótkizýge, kópshilik oryndarda (dámhana, meıramhana) jınalmaýǵa úndeımiz», deı kele, meıramhanalarǵa tapsyrys berip, aýyzy berik adamdarǵa tamaq taratý, áleýmettik jaǵdaıy tómen otbasylarǵa azyq-túlik taratý arqyly aýyz ashtyrý, aýyzasharǵa jumsalatyn shyǵyndardy oraza ustaǵan adamdarǵa qarjylaı berý sekildi izgi amaldarǵa shaqyrdy.
Astana jáne Qazaqstan Mıtropolıti Aleksandr pravoslav hrıstıandaryn Qasıetti Pashamen quttyqtady. «Bıyl Pasha meıramyn dinı qaýymnyń músheleriniń kóbisi májbúrli óz-ózin oqshaýlaý jaǵdaıynda atap ótedi. Úıde duǵa tilep, dinı ádebıet oqyp, ǵıbadat etý sharalaryn translıasııalar arqyly qarap, biz osy meıramǵa ortaqtasamyz», dedi Ortalyq kommýnıkasııalar qyzmetindegi brıfıngte. Sonymen qatar Mıtropolıt Pasha túninde «Eýrazııa birinshi» arnasynda meıramǵa oraı elimizdiń bas shirkeýinde ótetin ǵıbadat etý sharasynan tikeleı translıasııa ótetinin aıtty.