Aqmola oblysynyń dıqandary kóktemgi egis naýqanyna qaýyrt daıyndalýda. Dándi-daqyldar tuqymyn sebý mamyrdyń alǵashqy onkúndiginen keıin bastalmaq.
Bıyl 4,8 mıllıon gektar alqapqa dán sebilmek. Josparǵa sáıkes 5-shi maýsymda kóktemgi egis naýqany tolyq aıaqtalady dep boljanýda. Oblysta tuqym jetkilikti. Bıdaıdan ózge maıly daqyldar men kókónister de egiledi. Tanap basyna 14 myń traktor, 16 myń tuqym sepkish jáne 1200 egin egetin keshen shyǵarylady. О́nimdiligi joǵary tehnıka jazdyq tanaptyń 70 prosentin qamtamasyz etedi.
–Memleket tarapynan zor qoldaý bar. 10 jyl ishinde tehnıka parkin tolyǵymen jańartamyz. Sońǵy úsh aıdyń ishinde 30 traktor, 9 kombaın satyp alyndy. Egistik keshenderi, tuqym sepkishter, basqa da aýyl sharýashylyǵyna qajetti tehnıkalar alynyp jatyr. Naýryz aıynda 1 mıllıard teńgeden astam ınvestısııalyq sýbsıdııa tóledik. Osy aıda 4,5 mıllıardqa jetti. Munyń bári kóktemgi egis jumystaryn ótkizýde úlken qoldaý ekeni sózsiz,–deıdi oblystyq aýyl sharýashylyǵy basqarma basshysynyń mindetin atqarýshy Dımash Talasbaev.
El Prezıdentiniń tapsyrmasyna oraı óńirde aýyl sharýashylyǵy salasyn qoldaý jumystary belsendi júrgizilýde. Aqmola óńirinde 527 myń tonna tuqym, 68 myń tonna arzandatylǵan janar-jaǵar maı qory bar. Kóktemgi egis naýqanyn oıdaǵydaı ótkizýge jetkilikti.
Aqmola oblysynyń aýyl sharýashylyǵy salasynda 118 myńnan astam adam eńbek etedi.