Túrkistan oblysynyń agrarııleri bıylǵy jyly 8 myń gektar alqapqa erte shyǵatyn oramjapyraqty egip, sáýir jáne mamyr aılarynda 300 myń tonnaǵa jýyq ónim alýdy josparlap otyr. Sharýalar Tótenshe jaǵdaı kezinde ósirilgen ónimdi saqtaý jáne satý barysynda qıyndyqqa tap bolamyz dep alańdaýshylyq bildirgen bolatyn. Bul týraly Aýyl sharýashylyǵy mınıstrliginiń baspasóz qyzmeti habarlady.
Aýyl sharýashylyǵy mınıstrligi fermerlerge kómek retinde dúısenbi kúni oblys ákimdikterimen keńes ótkizip, oblystardy ózara azyq-túlik qory týraly aqparatpen almasyp, jetispeýshilik baıqalǵan aımaqtarǵa ónimniń artyqshylyǵy bar óńirlerden taýar almasýǵa shaqyrdy.
Nátıjesinde respýblıkanyń barlyq oblystarynyń jergilikti atqarýshy organdary jaqyn arada Ońtústik Qazaqstan oblysynan 50 myń tonna erte shyǵatyn oramjapyraqty satyp alýǵa daıyn ekendikterin habarlady.
Sonymen qatar Aýyl sharýashylyǵy mınıstrligi ónimdi eksporttaý úshin qajetti fıtosanıtarııalyq sertıfıkattardy jedel túrde berýde. Endi fermerler qalǵan 250 myń tonna ónimdi Reseı Federasııasyna esh kedergisiz sata alady.
Búgingi tańda Shymkent jáne Túrkistan oblystary boıynsha, 14 aýyl sharýashylyǵy taýar óndirýshileri – 4 myń tonnaǵa jýyq oramjapyraq úshin 204 fıtosanıtarııalyq sertıfıkat aldy.
Tez buzylatyn ónimderdi kedergisiz tasymaldaý úshin fermerlerdiń avtokólikterine «#BizBirgemiz Túrkistan oblysynyń azyq-túlik ónimderi» degen jazbamen logotıp jabystyrylady. Mundaı japsyrmalar fıtosanıtarııalyq jáne karantındik sertıfıkattarmen birge beriletin bolady.