Mıllıondaǵan jankúıer taǵatsyzdana kútip otyrǵan erejesiz jekpe-jekten UFC 249 týrnıri 9 mamyrda ótedi dep josparlanýda. Alaıda onyń qaı jerde uıymdastyrylatyny ázirge belgisiz.
Osy jarystyń basty básekesinde jeńil salmaqtaǵy AQSh-tyń qos sańlaǵy Tonı Fergıýson men Djastın Getjıdiń kúsh synasatyny belgili. Ekeýiniń de júrip ótken joly jarqyn jeńisterge toldy. 36 jastaǵy Kalıfornııa shtatynyń týmasy Tonı 28 kezdesýdiń tek úsheýinde ǵana utyldy. Sońǵy ret ol 2012 jyldyń kókteminde jeńilistiń kermek dámin tatty. Sol kezden beri Fergıýson shashasyna shań juqtyrmaı keledi.
Al 31 jastaǵy Djastın Arızona shtatynda dúnıege keldi. 23 ret oktagonǵa shyqqan ol 21 ret ústemdik tanytty. 2017 jáne 2018 jyldary Getjı qatarynan eki ret óz qarsylastaryna ese jibergen edi. Sodan keıingi úsh kezdesýdi óz paıdasynan sheshti. Osy jekpe-jekte jeńiske jetken sportshy «ýaqytsha chempıon» ataǵyn ıelenedi.
Sonymen qatar UFC 249 týrnıriniń tolyq karty jarııalandy. Bul básekeler myna sportshylar arasynda ótedi:
Genrı Sehýdo – Domınık Krýz; Amanda Nýnes – Felısııa Spenser; Frensıs Nganný – Jaırzıno Rozenstraık; Djeremı Stıvens – Kelvın Kattar; Donald Kovboı Serrone – Entonı Pettıs; Greg Hardı – Iorgan de Kastro; Alekseı Oleınık – Fabrısıo Verdým; Karla Esparza – Mıshel Ýoterson; Ronaldo Soýza – Iýraııa Holl; Vısent Lýke – Nıko Praıs;
Karol Roza – Braıs Mıtchell.