Bıznes qaýymdastyǵynyń usynystary eskerile otyryp, úsh quramdasty ıntegrasııalanǵan júıege jáne ony esepke alýǵa qoıylatyn talaptarǵa ózgerister engizildi, dep habarlaıdy Memlekettik kirister komıteti. Bıylǵy 31 naýryzdaǵy ózgertýler ÚIJ-ge qoıylatyn tehnıkalyq talaptardy retke keltirdi.
ÚIJ-ge qoıylatyn talaptardyń biri – salyq eseptiligi modýli. Bul júıede taýarlardyń qozǵalysy kórsetilip, sonymen qatar salyq esebin, onyń ishinde jaldamaly qyzmetkerlerdiń jalaqysy boıynsha esepti qurý múmkindigi bolý kerek. ÚIJ dara kásipkerlerge salyq mindettemelerin oryndaý men esep júrgizýdi jeńildetýge tıis.
ÚIJ ázirleýshileri men óndirýshileri ÚIJ Birińǵaı tizilimine jańa modelderdi tirkeý úshin Memlekettik kirister komıtetine ótinish tapsyra alady.
Jeńildetilgen deklarasııa men ÚIJ qoldanatyn salyq tóleýshiler birqatar artyqshylyqtarǵa ıe.
Jeńildetilgen deklarasııany qoldaný kezindegi salyq kezeńi úshin bolatyn shekti kiris, ıaǵnı jartyjyldyqta 66,8 mln. teńgeden 261,4 mln. teńgege deıin ósti. Qosylǵan qun salyǵynyń shegi 30 000 AEK-ten 144 184 AEK-ke deıin, ıaǵnı 83,3 mln. teńgeden 400,5 mln. teńgege deıin ulǵaıtyldy.Alaıda, bul ósim tek qolma-qol aqshasyz túrde júzege asyrylatyn aınalymǵa, ıaǵnı bank kartalary arqyly klıenttermen esep aıyrysýǵa qatysty bolady.
Eske sala keteıik, úsh quramdasty ıntegrasııalanǵan júıe derekterdi tirkeý jáne berý fýnksııasy bar baqylaý-kassa mashınasy, qolma-qol aqshasyz tólemderdi qabyldaýǵa arnalǵan júıe (qurylǵy), sonymen qatar saýdanyń basqarylýyn, qyzmetter kórsetýdi, jumystar oryndaýdy jáne taýarlardy esepke alýdy avtomattandyrýǵa arnalǵan qurylǵydan nemese osy úsh quramdas bólikti almastyratyn baǵdarlamalyq-apparattyq keshen.