Bul týraly qoǵamdyq kommýnıkasııa ortalyǵynda Mańǵystaý oblysy Jastar resýrstyq ortalyǵynyń basshysy Abylaı Fazylbek pen Mańǵystaý oblystyq volonterlar korpýsynyń jetekshisi Muqash Oralbaıdyń qatysýymen ótken brıfıngte málim boldy.
Mańǵystaý oblysynyń volonterlar korpýsy óńirdegi tótenshe jaǵdaı kezinde operatıvti qyzmet kórsetetin volonterlik shtab qurdy, quramynda 15 volonter bar. Volonterlik shtab negizgi aqparattyq jumys, adrestik kómek jáne Mańǵystaý oblysynda júzege asyrylatyn «Birgemiz: Bilim» jobasyna volonterlik qoldaý kórsetý syndy úsh baǵyt boıynsha jumys júrgizýde.
Aqparattyq jumys baǵytynda azamattarǵa tótenshe jaǵdaı kezindegi qaýipsizdik erejeleri men is-qımyldary, koronavırýstan qorǵaný týraly aqparattandyrý, qala turǵyndaryna arnalǵan aqparattyq ınfografıka ázirleý jáne ony taratý(maska tigýshiler týraly, jetkizý qyzmeti bar meıramhanalar men dárihanalar týraly aqparat) jumystary júrgiziledi. Qala turǵyndaryna 1000-nan asa jadynama taratylyp, aıaldamalar men aqparattyq týmbalarǵa, turǵyndar kóp shoǵyrlanǵan oryndarda 300-ge jýyq aqparattyq betsheler japsyryldy. Al ekinshi baǵyt boıynsha elimizde tótenshe jaǵdaı rejımi engizilgennen bastap, 3 sáýirge deıin volonterlar korpýsy 17 azamatqa adrestik kómek kórsett. Volonterlar «Nur Otan» partııasynyń «Birgemiz» aksııasynda kórsetilip jatyrǵan áleýmettik kómekti azamattarǵa jetkizý jumystaryna jumyldyrylǵan. Búginde bizdiń volonterlardyń kómegimen 104 azamatqa áleýmettik kómek kórsetildi. Sondaı-aq óńirde sáýir aıynan bastap Ahmet Baıtursynuly bilim akademııasynyń uıymdastyrýymen «Birgemiz: Bilim» jobasy baǵyttarynyń biri – aýyldyq jerdegi áleýmettik jaǵynan osal topqa jatatyn bitirýshi túlekterge arnalǵan UBT-ǵa daıyndyq kýrsy bastaý aldy. Atalǵan kýrsqa oblys kóleminde 200 oqýshy iriktelip alyndy. Aldaǵy ýaqytta oqýshylar kásibı mamandardyń kómegimen mindetti jáne beıindik (oqýshy tańdaǵan) pánderdi vıdeosabaq alatyn bolady.
-Sondaı-aq, jastar resýrstyq ortalyǵynyń barlyq jobalary men is – sharalary onlaın rejımine kóshti. Bul jobalar men túrli saıystar Mańǵystaý oblysynyń jastar resýrstyq ortalyǵynyń Instagramm, Facebook, YouTube ınternet jelilerindegi «Mańǵystaý jastary» atty paraqshasynda ótedi, deıdi MO Jastar resýrstyq ortalyǵynyń basshysy Abylaı Fazylbek.
Qaladaǵy negizgi qaıyrymdylyq is-sharalardy uıymdastyrýshy – «Biz adambyz – biz birgemiz» qory «Altyn Food» sýpermarketter jelisi jáne t.b. óndiris jáne bıznes sýbektileriniń qoldaýymen kúndelikti 35 dárigerdi túski aspen, ár senbi saıyn meken-jaıy anyqtalmaǵan 70 azamatty ystyq taǵammen qamtamasyz etip, Aqtaý qalasy men Saıyn aýylynyń 225 otbasyna áleýmettik kómek kórsetýde.
«Atadan mıras» QQ men qala volonterlary 320 muqtaj otbasyny bir aılyq azyq-túlikpen qamtamasyz etýde.
«Klýb dobrıakov» toby jalǵyzbasty, múmkindigi shekteýli jáne kópbalaly otbasy sanatyna jatatyn 230 azamatqa áleýmettik kómek kórsetip, karantındik zonada qyzmet etip júrgen polısııa qyzmetkerlerin ystyq taǵammen qamtamasyz etip otyr.
«Aqtaý qaıyrymdy jandary» toby 30 otbasyǵa áleýmettik kómek, 6 otbasyǵa qarjylaı kórsetti.
«Qoǵamdyq kelisim» mekemesiniń volonterlary,kásipkerler men etnomádenı birlestikter 40 otbasyna azyq-túlikter, gıgıenalyq quraldarmen qamtamasyz etti. MO QHA janyndaǵy analar keńesi áskerı qyzmetkerlerge 300 maska, «Choson» etnomádenı birlestigi 100 maska úlestirdi.