Shymkenttegi «Bal Tekstıl» fabrıkasy ónimderiniń 20 paıyzy alys jáne jaqyn shetelderge eksporttalady, dep habarlady IIDM baspasóz qyzmeti.
Kez-kelgen mekemeniń nemese úıdiń ádemi bezendirilýin túrli kilemder tolyqtyratyny anyq. Adamdar onyń ásem órnekterine qarap, tamsanyp qana qoımaı, bar jylýy men náziktigin sezinedi. Qazirgi naryqta kilemderdiń túriniń kóptigi sonsha, durys tańdaý jasaýdyń ózi ońaı emes.
Elimizdegi kilem jáne kilem buıymdaryn shyǵaratyn kóshbasshy ónerkásip oshaqtarynyń biri - Shymkent qalasyndaǵy «Bal tekstıl» fabrıkasy. Kásiporyn - otandyq kásipkerler men Túrkııanyń «Kartal Tekstil Sanayi Ve Ticaret LTD. STI» kompanııasynyń ortaq jobasy. Bul fabrıka - Túrkııada kilem óndirý salasynyń alǵashqy ondyǵyna kiretin iri taýar eksporttaýshysy.
Otandyq kásiporyn 2013 jyldan «Ońtústik» arnaıy ekonomıkalyq aımaǵynyń aýmaǵynda óz ónimderin shyǵara bastady. Búgingi tańda fabrıkanyń óndiristik qýaty óte joǵary. Jylyna 4 mln sharshy metrden astam kilem jáne kilem buıymdaryn, sondaı-aq 4 myń tonna polıpropılen jip shyǵarady.