Tótenshe jaǵdaı Shymkenttegi jol jóndeý jumystaryna qolbaılaý bolmaýy kerek. Kóshedegi kólik qozǵalysynyń azdyǵy men jurttyń jappaı úıde otyrǵan sátin tıimdi paıdalanǵan jón. Búgin qala aýmaǵynda júrip jatqan jol qurylys jumystarynyń barysymen tanysqan qala ákimi Murat Áıtenov osylaı dep málimdedi.
«Qalanyń ortalyǵynda tursaq ta talaıdan beri topyraq keship júr edik. Endi mine kóshemizge asfalt jol tóselip, sý aǵar aryqtar ornatylyp jatyr. Ásirese bul jaǵdaıǵa balalarymyz qatty qýandy. Kóshemizdiń ajary kirdi. Bul úshin qala turǵyndarynyń atynan alǵysymyz sheksiz», dedi qala ákimimen júzdesken «Samal-2» shaǵyn aýdanyndaǵy Seıitov kóshesiniń turǵyndary.
Qaladaǵy Gagarın kóshesi men Respýblıka dańǵylyndaǵy jol qurylysy da qarqyndy júrýde. Qalaǵa kireberistegi ortalyq dańǵyl boıyndaǵy qurylysty aralaǵan qala basshysy merdigerlerge birinshi kezekte sapaǵa mán berýdi tapsyrdy. Oǵan qosa karantın kezinde jumysshylardyń barlyq saqtyq sharalaryna muqııat bolýdy júktedi.
«Samal» bazaryna barar jol boıynyń qos qaptalyndaǵy aıaqjoldar men sýaǵar latoktardyń arasynda ashyq jerlerdi jasyl jelekpen kómkerýdi tapsyrdy. Jol qurylys sapasyn barlyq talaptarǵa saı júrgizý úshin qurylys basynda kúndelikti baqylaýshylar saraptama júrgizip jatyr. Oǵan qosa sol kóshe turǵyndaryn tikeleı qurylysty qadaǵalap turýǵa shaqyrdy.
Shymkent qalasynda avtomobıl joldarynyń jalpy uzyndyǵy 297 606 shaqyrymdy quraıdy. Onyń 56,5%-y qanaǵattanarlyq jaǵdaıda. Qaladaǵy jol sapasyn damytý maqsatynda 417,6 shaqyrym joldy qurylys-jóndeý jumystaryna bıyl bıýdjetten 25,6 mlrd teńge baǵyttalǵan. Onyń 5,1 mlrd qarjysy respýblıkalyq qazynadan bolsa, qalǵany jergilikti bıýdjet esebinen júrgizilýde. Nátıjesinde 294 shaqyrym jol men 6 kópir jáne 1 jolaıryq paıdalanýǵa beriledi.
Qala ákimi sondaı-aq Shymkent áýejaıyndaǵy jańa termınal qurylysymen tanysty. Mundaǵy qurylys birneshe kezeń boıynsha júrýde. Barlyq qurylǵy zamanaýı úlgide bolady. Jolaýshylardy ótkizý jáne júk qabyldaý sıfrly túrde júrgiziledi. Odan keıin áýe kemelerine arnalǵan perrondy keńeıtý josparda bar. Termınalǵa aparatyn jańa jol men ınjenerlik qurylym men abattandyrý jumystary da birge aıaqtalady, dep josparlanǵan. Merdigerlermen júzdesken qala ákimi júk tasymaldaýshy kólikterdiń júrip-turýy úshin barlyq jaǵdaı jasalǵanyn atap ótti.
«Qurylysqa qajetti zattardyń basym bóligi otandyq. Sondyqtan sapasy joǵary bolady», dep atap ótti kompanııa ókilderi.
Shymkent