Búginde Jambyl oblysynda ornalasqan óndiris oryndarynyń jumysyn ilgeriletý, kásipkerlerdi qoldaý máseleleri qolǵa alynýda. Osy oraıda oblys ákimi Berdibek Saparbaev «Jardem-109» monıtorıng jáne jedel áreket etý aqparattyq ortalyǵynda bolyp, «Taraz bylǵary aıaqkıim» JShS fabrıkasynda, «Ta-Mak» JShS-ine jáne «BM» óndiristik kásipornyna bardy.
Taraz qalasy ákimdiginiń 109 biryńǵaı dıspetcherlik qyzmeti oblys ortalyǵynyń tynys-tirshiligine qatysty ártúrli máseleler boıynsha azamattardyń ótinishterine jedel áreket etý maqsatynda qurylǵan. Alaıda bul qyzmet búginde óz mindetin tolyqtaı atqaryp otyrǵan joq. Osyǵan baılanysty 109 qyzmetin oblys ákimi apparatynyń qaramaǵyna berý jáne onyń bazasynda búkil oblysty qamtıtyn Biryńǵaı baılanys ortalyǵyn qurý máselesi óz sheshimin tabady. «Bul ortalyqta oblystaǵy jumystardyń ahýaly týraly barlyq aqparat shoǵyrlanýy tıis. Osy rette qazirgi ýaqyttaǵy koronavırýstyq ınfeksııaǵa qarsy áreket etý boıynsha tolyq aqparattyq baza qurý qajet. Sondaı-aq munda barlyq áleýmettik tólemder, memlekettik baǵdarlamalardy iske asyrý jáne jergilikti atqarýshy organdar qyzmetiniń basqa da salalary boıynsha baza qalyptastyrylady. Ortalyq qyzmetkerleri azamattardyń kelip túsken ótinishterine jedel nazar aýdaryp jáne olar tarapynan týyndaǵan máselelerdi sheshý joldaryn qarastyrýǵa mindetti», dedi Berdibek Saparbaev.
Budan soń ol «Taraz bylǵary aıaqkıim» JShS-ne bardy. Bir kezderi bul kásiporynnyń ónimi tek Qazaqstanda ǵana emes, shetelderde de tanymal bolatyn. Alaıda, keıingi ýaqytta zaýyt úlken qıyndyqtardy bastan ótkerdi. Búginde munda áskerı qyzmetshiler men jumysshylarǵa arnalǵan báteńkeler daıyndalady. Biraq zaýyt qaryzdary jyl sanap ósýde. Kásiporyn basshylyǵyna tutynýshylardyń suranysyna saı taýarlardyń jańa túrlerin shyǵarý múmkindigin qarastyrý kerektigi usynyldy. Al, «Ta-Mak» jaýapkershiligi shekteýli seriktestiginiń «Arzý» makaron fabrıkasynda jumys qyzý júrýde. Onyń jaıma, kespe, laǵman ónimderi Qazaqstan aýmaǵynda joǵary suranysqa ıe. Tutynýshylardy ónimniń sapasy men onyń túpnusqa oramasy qyzyqtyrady. Atalǵan kásiporyn dırektory Gúlmıra Konkashevanyń aıtýynsha, aldaǵy ýaqytta kásiporynnyń jańa óndiristik jelisin iske qosý josparlanyp otyr eken. Ol boıynsha ıtalııalyq kásipkerlermen ortaq kelisim de jasalǵan. Berdibek Saparbaev kásiporyn basshylyǵyna rojkı, vermıshel sekildi jańa ónim túrlerin shyǵarýdy usyndy. Mundaı ónimder óńirdegi saýda jelisine elimizdiń basqa aımaqtarynan jáne shetelderden jetkiziletinin atap ótti. Sondaı-aq Jambyl aýdanynyń Jalpaqtóbe aýylynda ornalasqan «BM» óndiristik kásipornynda da jumystardyń ilgerileýi baıqalýda. Atalǵan JShS bas dırektory Sultan Mahmadovtyń aıtýynsha, búginde zaýyt qurama jem óndirýge mamandanǵan. Al jýyrda koronavırýstyń taralýyna baılanysty munda antıseptıkter shyǵarylady. Berdibek Saparbaev kásiporyn qyzmetin oń baǵalap, onyń damýyna barynsha qoldaý kórsetýge ýáde berdi.
Jambyl oblysy