Karantın aıaqtalǵannan keıin shaǵyn jáne orta bıznesti jyldam qalypqa keltirý maqsatynda elektrondy saýda salasynyń ókilderi bankaralyq komıssııany tómendetýdi surap otyr.
Sala mamandary el Úkimeti men Ulttyq bankti elektrondy ıntercheındj kezinde shekteýli bankaralyq komıssııany belgilep, onyń 0,7%, al ınternet-ekvaırıngtiń shektik mólsherin 1% asyrmaýdy suraıdy.
Daǵdarys kezinde ekonomıkanyń qyzmet kórsetý salasyn qoldaýdaǵy mańyzdy qadamdardyń biri elektrondy tólem barysynda bankaralyq komıssııalardy shekteý. Ulttyq banktiń tómendetý mólsherlemesi dárihanalardan ózge qajettilikterge júrmeıdi. Azyq-túlikti onlaın satyp alý, taǵamdy úıge jetkizý, úıge arnalǵan taýarlar, elektronıka, t.b. máseleler ózekti bolyp otyr.
Qazirgi kezde ıntercheındj 1,6-1,7% quraıtyndyqtan, elektrondy saýda ókili úshin ár saýdadan tólem júıesindegi komıssııamen 2,4-3% tóleýge týra keledi. Bul kórsetkish tutynýshynyń qaltasyna da áser etedi. Iаǵnı, taýar baǵasy qymbattaıdy ári elekrondy kommersııamen aınalysatyn kompanııanyń tapqan tabysyna yqpal etedi. Bul bir jaǵynan kóleńkeli ekonomıkanyń damýyna soqtyratyn bolsa, ekinshiden sapaly jumys oryndaryn qurýǵa keri yqpalyn tıgizedi, deıdi elektrondy naryq qatysýshylary. Damyǵan elderde ıntercheındj mólsherlemesi regýlıatormen bekitilip, memleket tarapynan qatań baqylaýǵa alynǵan. Mysaly, Eýro odaq elderinde debettik mólsherleme 0,2% bolsa, nesıelik mólsherleme 0,3%.