Koronavırýs indetine qarsy kúres boıynsha Batys Qazaqstan oblysy komıssııasynyń shuǵyl shtabynyń málimetinshe, 16 sáýir kúni tańerteń óńirde vırýs juqtyrǵandardyń sany 25-ke jetti.
Batys Qazaqstan oblysynda koronavırýs ınfeksııasyn juqtyrǵan taǵy 5 adam anyqtaldy. Olardyń bári oblys turǵyndary, - dedi oblystyq taýarlar men kórsetiletin qyzmetterdiń sapasy men qaýipsizdigin baqylaý departamenti basshysynyń orynbasary Nurlybek Mustaev.
Bir naýqas Reseı Federasııasynda vahtalyq ádispen jumys jasaıtyn koronavırýstyq ınfeksııa anyqtalǵan azamatpen birge kelgen. Ekinshi azamat koronavırýsqa shaldyqqan naýqaspen baılanysta bolǵan adam retinde tirkeldi. Al qalǵan úsheýi – Reseı Federasııasynda vahtalyq ádispen jumys isteıtin azamattar eken.
Reseı Federasııasy shekaradaǵy «Tasqala» beketinde sanıtarlyq karantın beketi qyzmetkerleri kelýshilerden saýalnama alyp, termometrııamen qashyqtan tekserý kezinde eki adamnyń dene qyzýy kóterilgeni baıqalǵan. Olardy COVID-19 zerthanalyq tekserý úshin jedel járdem kóligi shaqyrtylyp, karantındik stasıonarǵa jatqyzyldy. Keıin olardyń COVID-19 dıagnozy naqtylandy.
«Qazir naýqastar oblystyq juqpaly aýrýlar aýrýhanasyna jatqyzyldy. Olarmen qarym-qatynasta bolǵan adamdar anyqtalýda. Aýrý oshaqtarynda dezınfeksııalyq jumys júrgizilýde. Epıdemııaǵa qarsy is-sharalar jalǵasýda»,- deıdi Nurlybek Mustaev.
Sonymen, sońǵy málimetter boıynsha Batys Qazaqstan oblystyq juqpaly aýrýlar aýrýhanasynda – 24 adam, provızorlyq stasıonarda – 70 adam, karantın ortalyǵynda – 113 adam, al úı karantıninde 1370 adam oqshaýlanýda.
Batys Qazaqstan