Ańshylyq maýsym bastaldy

Ań aýlaý erejeleriniń talaptaryna sáıkes, Qa­­zaqstan aýmaǵynda 7 qyrkúıekten bastap sýda júzetin qustarǵa, tuıaqty janýarlar men jyrtqyshtarǵa kúzgi ańshylyq maýsymy bastalady.

Qazaqstan aýmaǵynda ań­shylyq nysandaryna qus­tardyń 59 jáne sút­qo­rek­tilerdiń 34 túri jatqy­zy­lady. Qoldanystaǵy zań­na­ma talaptaryna sáıkes, ań­shylyq júrgizý tek ań­shylyq sharýashylyqtar aýmaq­tarynda ǵana ruqsat etiledi.

Qazaqstannyń ańshylyq alqaptarynyń jalpy aýdany 228 mln. ga qurap, onyń 120,4 mln. ga (53,0%) ańshylyq sha­rýashylyqtaryna qarasty.

Búgingi kúni respýblı­ka­myzda 634 ańshylyq sharýa­shylyqtary tirkelgen. Qo­ryqshylar sany 2447 adam­dy quraıdy. Janýarlar dú­nıesin qorǵaý sharalaryna 2103 avtokólik jáne basqa da tehnıka jumyldyrylǵan. El boıynsha 130 myńnan astam ańshy tirkelgen.

Áýesqoı (sporttyq) ań aýlaýshy ańshyda mynadaı qujattar bolýy tıis:

1) ańshy kýáligi;

2)Qazaqstan Res­pýb­­lıkasynyń salyq zańnama­synda bekitilgen ańshy kýá­ligin jyl saıynǵy tirkeý úshin tólenetin memlekettik baj salyǵynyń tólengeni týraly túbirtek;

3) janýarlar dúnıesin paı­dalanýǵa ruqsat;

4) ańshylyq sharýashylyǵy sýbektisiniń joldamalary;

5) ańshylyq atys qarýyn qoldanyp ań aýlaǵan kezde ańshylyq atys qarýyn saqtaý jáne alyp júrý quqyǵyna bergen Qazaqstan Respýblıkasy ishki ister organdarynyń ruq­saty;

5) jyrtqysh qustarmen ań aýlaǵan kezde belgilengen tártippen berilgen tirkeý týraly qujattar.

Tuıaqty janýarlar men qońyr aıýdy oljalaý qoryq­shynyń nemese janýarlar dúnıesin qorǵaý, ósimin molaıtý jáne paıdalaný jónindegi memlekettik ınspektordyń qatysýymen júrgizilýi tıis. Osy janýarlardyń olja­lanǵany týraly belgini osy adamdar jasaıdy.

En salynǵan (saqına, mıkrochıp salynǵan) qustardy nemese sútqorektilerdi oljalaý kezinde oljalaýdyń kúni men orny kórsetilgen aqparat, saqına, mıkrochıp jáne basqa da belgiler keıinnen ǵylym men ǵylymı-tehnıkalyq qyzmet salasyndaǵy basshy­lyqty júzege asyratyn ýáki­letti memlekettik organǵa tap­syrylý úshin ańshylyq sharýashylyǵy sýbektisiniń ýákiletti tulǵasyna nemese Qorshaǵan ortany qorǵaý mınıstrliginiń Orman jáne ańshylyq sharýashylyǵy komıtetiniń oblystyq aýmaq­tyq bólimshelerine beriledi.

Ańshylyq júrgizý barysynda órt qaýipsizdigi sharalaryn qamtamasyz etip, ańshylyq alqaptardyń tur­mystyq, kásiptik qal­dyqtarmen lastanýyna jol berilmeýi tıis.

«Janýarlar dúnıesin qorǵaý, ósimin molaıtý jáne paıdalaný týraly» zań men Qazaqstan aýmaǵynda ań aýlaý erejeleriniń talaptaryn oryndamaǵan azamattar elimizdiń qylmystyq jáne ákimshiliktik zań buzý­shylyqtar týraly kodeksteri boıynsha jaýapkershilikke tartylady, dep habarlady Qorshaǵan ortany qorǵaý mınıstrliginiń baspasóz qyzmeti.