El ishinde memleket tarapynan tólenetin ataýly áleýmettik kómekti ásheıin kelgen nársedeı kórip, ońdy-soldy jumsap júrgender kezdesedi. Bul – áleýmettik qoldaýdyń qadir-qasıetin baǵalaı bilmeýdiń, otbasy tabysyn tolyqtyrýǵa moıny jar bermeýdiń kórinisi. Mundaı jaǵdaıda olardyń kedeıshilik sheginen shyǵa qoıýy ekitalaı.
Árıne, eldiń sheti men jeldiń ótinde turatyn turǵyndar arasynda birdi eki etýge umtylyp, AÁK-ti tıimdi túrde jumsaýdyń tetikterin taba bilgen turmysy tómen otbasylar da jetkilikti. Atap aıtqanda, Qobda aýdanynda ótken jyldyń qorytyndysy boıynsha 286 otbasyna 154 mıllıon teńge kóleminde AÁK tólengen. Mine, sonyń ishinde 196 otbasy alǵan qarjylaı kómekteriniń birde-bir teńgesin shashaý shyǵarmaı, óz kásipterin ashýǵa jumsaǵan.
Bul turǵyda aýyl ákimderi turǵyndardyń ózderine tıesili AÁK-ti tıimdi túrde jumsaı bilýine uıytqy boldy. Sóıtip júzdegen shańyraq shaǵyn otbasylyq sharýashylyqtyń negizi qalanǵan. Turmysy kedeıshilik sheginen tómen otbasylar iri qara men qoı-eshki sekildi usaq mal jáne qaz, úırek, kúrketaýyq qustaryn satyp alǵan.
Aıtalyq, az qamtylǵan kóp balaly otbasy ıeleri, erli-zaıypty Muzdaqbaı Jetegenov pen Dınara Shyndaýylova 620 myń teńge kólemindegi AÁK qarajatyna 1 bas iri qara jáne 10 bas usaq mal satyp alyp, jeke qosalqy sharýashylyǵyn qurdy. Buǵan deıin Dınara negizinen bes balanyń tárbıe kútimimen aınalysyp kelgen eken.
«Aldaǵy ýaqytta qosalqy sharýashylyǵymyzǵa qaraılasý maǵan qıyndyq keltirmeıdi. О́ıtkeni ul-qyzdarymyz bir-birine súıenish, taıanysh bolatyndaı jasqa jaqyndap, ósip keledi», deıdi D.Shyndaýylova. Al otaǵasy aýdandyq bilim bóliminde gaz qazandyǵynyń operatory bolyp jumys isteıdi. Jalaqysynyń mólsheri bes balany asyraýǵa múmkindik bermeıdi. Osy oraıda olar ózderine memleket tarapynan ataýly áleýmettik kómek taǵaıyndalǵanyna dán rıza.
Taǵy bir turmysy tómen otbasy Qaırat Qaıroshuly men Aınar Sabyrqyzy týraly aıtaıyq. Otaǵasy «Ersin» jeke kásip ıeliginde qarapaıym jumysshy eken. Zaıyby Aınar bala kútiminde kórinedi. Olar AÁK-tiń 750 myń teńge kólemindegi qarajatyna úsh sıyr satyp alyp, jeke qosalqy sharýashylyǵyn qurypty. Qobda aýdanynda eńbekqor, tabandy, jumys dese janyn beretin jandar qatary tek munymen shektelmeıdi.
Grant alyp, jeke kásipterin ashqandar olardyń qataryn tolyqtyra túsýde. Bul tigin, aıaqkıim jóndeý jáne jıhaz jınaý sehtary, sondaı-aq azyq-túlik dúkenderi. Násibin adal eńbek, mańdaı termen aıyryp otyrǵan, óz otbasylaryn jetkilikti tabyspen qamtýǵa jol asha bilgen turmysy tómen otbasylar qurmetke laıyqty. Memleket tarapynan taǵaıyndalǵan AÁK pen granttar tek osyndaı jaǵdaıda tekke ketpeı, qaıtarym koeffısıentin kótere alary anyq.
–Mundaı sanattaǵy ata-analar óz kindiginen taraǵan perzentterine qurǵaq sóz kúıinde emes, naqty is júzinde úlgi-ónege kórsetedi. Sonymen birge otbasy bıýdjetin toltyrý isi de sheshimin tabady. Bizdiń basty paryzymyzdyń biri – dál osy sanattaǵy shańyraq ıelerine udaıy qoldaý kórsetý. Kóńilge bir medeý tutarlyq jaıt, aýdanymyzda jaǵdaıyn jaqsartýǵa umtylǵan otbasylardyń qatary jyl saıyn kóbeıip keledi, – dedi Qobda aýdanynyń ákimi Meırambek Shermaǵanbet.
Aqtóbe oblysy,
Qobda aýdany