Aýyl sharýashylyǵyn qarjylaı qoldaý qoryna nesıe boıynsha tólemderdi keıinge shegerý jóninde myńdaǵan ótinish kelip tústi. Bul týraly Aýyl sharýashylyǵynyń baspasóz qyzmeti habarlady.
Memleket basshysy Qasym-Jomart Toqaevtyń tapsyrmasyna sáıkes Aýyl sharýashylyǵyn qarjylaı qoldaý qory («QazAgro» holdınginiń enshiles kompanııasy) tótenshe jaǵdaı kezinde bıznes ıeleriniń nesıe júktemesin jeńildetý baǵytynda birqatar sharalardy júzege asyrýda.
2020 jylǵy 16 naýryzdan 15 maýsymǵa deıingi kezeńde tólemderdi keıinge qaldyrý úshin qaryz alýshysy Qorǵa qarjylyq jaǵdaıdyń nasharlaǵanyn rastaıtyn qujattarmen qosa ótinish jazýy kerek. О́tinishti sharýalar elektrondyq poshta nemese messendjer arqyly jibere alady. 7 jumys kúni ishinde Qor ótinimdi qarap, jaýap beredi.
Tólemdi ýaqytsha toqtata turý klıenttiń nesıe tarıhyna keri áser etpeıdi.
Búginde Qor fılıaldaryna qarjylyq jaǵdaılarynyń nasharlaýyna baılanysty myńnan asa ótinish kelip tústi. Onyń ishindegi jalpy somasy 240 mıllıon teńge bolatyn 582 ótinish maquldandy. Qalǵan ótinishter qaralýda.
Aıta ketý kerek, Aýyl sharýashylyǵyn qarjylaı qoldaý qory «Eńbek» nátıjeli jumyspen qamtýdy jáne jappaı kásipkerlikti damytý baǵdarlamasy aıasynda nesıeleý jumystaryn jalǵastyrady. Aýyl sharýashylyǵy jáne aýyl sharýashylyǵyna jatpaıtyn bıznes baǵyttary qarjylandyrylady. Atap aıtqanda, mal sharýashylyǵy men ósimdik sharýashylyǵyna, aýyl sharýashylyǵy ónimderin qaıta óńdeý men saqtaýǵa jáne kásipkerliktiń basqa da túrlerine nesıe beriledi.
Nesıeniń jyldyq mólsheri – 6 paıyz, tıimdi syıaqy mólsheri 6,7 paıyzdan aspaıdy. Nesıe merzimi – 6,5 jylǵa deıin. 2 jylǵa deıin jeńildik merzimi bar, odan keıin negizgi qaryz qaıtarylady.
Qor kásipkerlerge yńǵaıly kepildik saıasatyn usynady. Iаǵnı, nesıe alýshy aýyldyq jerlerdegi jyljıtyn jáne jyljymaıtyn múligin kepildikke qoıa alady.