Karantınge baılanysty Qyzylorda qalasy aýmaǵynda qoıylǵan tosqaýyl beketterinde shekteý sharalary taǵy da kúsheıe tústi. Bul ásirese kúndelikti qajetin qaladan taýyp otyrǵan shaharǵa jaqyn saıajaılar men eldi-meken turǵyndary úshin qıyn tıip otyr.
Osyǵan baılanysty qalanyń shet aımaqtaryndaǵy turǵyndar azyq-túlikten taryqpaýy úshin qala ákiminiń tapsyrmasymen qolǵa alynǵan bastamany «Mıras» jáne «Anvar» saýda ortalyqtary qoldap, kóshpeli saýda uıymdastyrdy.
«Edelveıs», «Sabalaq», «PMK-29», «Elektromontajnık», Naýryz, Aqsýat saıajaılary men eldi mekenderinde turatyndarǵa naryq baǵasynan 5-10% tómen baǵada azyq-túlik pen turmysqa qajetti zattar jetkizildi. Jalpy kóshpeli saýdada kartop, pııaz, sábiz, kúrish, rojkı, sút, sháı, ósimdik maıy men sabyn, untaq, sirińke, hımııalyq tazartqyshtar satylymǵa shyǵaryldy. Alǵashqy saýdada 5 tonnaǵa jýyq azyq-túlik pen turmystyq zattar satylypty.
Buǵan qosa, «Evrofarm» JShS uıymdastyrǵan jyljymaly dárihana qyzmeti qalanyń shet aımaqtaryna shyǵyp, óz taýarlaryn halyqqa usynýda.
– Turǵyndar syrtqa barmaı-aq úıiniń aldyna kelip turǵan jyljymaly kólikten qoljetimdi baǵada qajetti zatyn aldy. Bul jumystar tótenshe jaǵdaı kezeńinde jalǵasa beredi, – dedi qalalyq kásipkerlik, ónerkásip jáne týrızm bóliminiń basshysy Almasbek Esmahanov.