«Dúnıejúzi qazaqtarynyń qaýymdastyǵy» men «Otandastar qory» M.Qozybaev atyndaǵy Soltústik Qazaqstan memlekettik ýnıversıtetinde shetelden kelip bilim alyp jatqan qandas stýdenttermen onlaın-jıyn ótkizdi.
Is-sharaǵa «Otandastar qory» KeAQ prezıdenti keńesshisi Dıdar Bolat, Ulttyq testileý ortalyǵy dırektorynyń orynbasary Naýjan Dıdarbekova, M.Qozybaev atyndaǵy SQMÝ «Foundation» fakýltetiniń dekany Almagúl Avdolhanqyzy, «Otandastar qory» KeAQ Bilim baǵyty boıynsha jaýapty qyzmetkerleri Nurymjan Jumaǵazıev pen Aljan Sharıfov qatysty.
Jıyn barysynda Ulttyq testileý ortalyǵy dırektorynyń orynbasary Naýjan Dıdarbekova atalǵan oqý ornynyń daıyndyq bólimi, bakalavrıat, magıstratýra jáne doktorantýrada oqıtyn stýdentterin 2020 jylǵy testileýge qatysty bekitilgen ózgertýler men jańartýlardan habardar etti.
Al «Otandastar qory» KeAQ prezıdent keńesshisi Dıdar Bolat stýdentterdiń tótenshe jaǵdaıdaǵy usynystarymen tanysyp, Petropavl qalasyndaǵy front-ofıstiń jumysyn baǵalady. Bul front-ofıs qandas stýdentterge jan-jaqty qoldaý jasaýda.
Sondaı-aq «Otandastar qory» tótenshe jaǵdaı kezinde ótkiziletin onlaın is-sharalaryna stýdentterdi belsendi qatysýǵa shaqyrdy. Buǵan qosa qor qyzmetkerleri Volonter jylynda eriktilerge beriletin múmkindikterge toqtalyp, pikirsaıys klýby týraly tolyqqandy aqparat berdi.