Jambyl oblystyq polısııa departamentiniń habarlaýynsha, oblystyń Jambyl aýdany, Jalpaqtóbe aýylynyń mańynda polısııa qyzmetkerleri qyzmettik ıttiń kómegimen 35 jastaǵy er adamdy ustaǵan. Qolǵa túsken kólik júrgizýshisi blok-beketten esirtki alyp ótpek bolǵan.
«Atalǵan aýyl mańyndaǵy blok-bekette oblystyq polısııa departamentiniń jergilikti polısııa qyzmeti jáne esirtki qylmysyna qarsy is-qımyl basqarmasynyń qyzmetkerleri «Aýdı-100» markaly avtokóligin toqtatyp, ony tekserý barysynda júrgizýshi kúrtesiniń ishki qaltasynan esirtki zatyn tapty», delingen departament habarlamasynda.
Sot-hımııalyq saraptamanyń qorytyndysyna sáıkes, tárkilengen zattyń marıhýana ekendigi belgili bolǵan. Sonymen qatar, oblystyq polısııa departamenti ustalǵan azamat óz kinásin tolyq moıyndaǵanyn, qazirgi tańda Qazaqstan Respýblıkasy Qylmystyq Kodeksiniń 296-baby, 2-bóligi boıinsha sotqa deıingi tergeý bastalǵanyn habarlady.
Jambyl oblysy