Álem jurtshylyǵyn alańdatqan koronavırýsqa qarsy saqtyq sharalary Shymkent qalasynda da kúsheıtilip jatyr. Búgingi tańda jergilikti bılik qosymsha profılaktıkalyq sharalardy qolǵa aldy. Tótenshe jaǵdaı rejımin qamtamasyz etý jónindegi Memlekettik komıssııanyń kezekti otyrysynda Prezıdent Qasym-Jomart Toqaev «Ońtústik – halqy tyǵyz ornalasqan óńir. Sondyqtan indettiń taralýyn toqtatpasaq, jaǵdaıdy ýshyqtyryp alamyz» dep, jergilikti atqarýshy organdarǵa karantın sharalarynyń oryndalýyn qatań baqylaýǵa alýdy tapsyrǵan bolatyn. Osy oraıda, biz ońtústik óńirdegi eń iri qala, elimizdiń úshinshi megapolısi – Shymkent shaharynda Memleket basshysynyń atalǵan tapsyrmasy qalaı oryndalyp jatqanyna toqtalyp, 13-19 sáýir aralyǵynda atqarylǵan jumystarǵa sholý jasap kórmekpiz.
Shymkentte 1 mamyrǵa deıin birqatar shekteý engizildi
Koronavırýstyq ınfeksııanyń (COVID-19) taralýyna jol bermeý jáne epıdemıologııalyq jaǵdaıdyń asqynýynyń aldyn alý maqsatynda Shymkent qalasynyń Bas memlekettik sanıtarııalyq dárigeriniń 2020 jylǵy 18 sáýirdegi №11 «Karantındik sharalardy kúsheıtý týraly» qaýlysy shyqqan bolatyn.
Shymkent qalasy ákiminiń orynbasary Maqsut Isahov málimdeýinshe, atalǵan qaýlyǵa sáıkes, Shymkent qalasynyń barlyq aýmaǵynda 2020 jyldyń 19 sáýiri saǵat 00:00-den bastap 01.05.2020 jyly saǵat 07.00-ge deıin birqatar shekteýler engizildi.
-Atap aıtsaq, aıyrbastaý pýnktteriniń, mıkrofınanstyq uıymdardyń qyzmetin onlaın jumys rejımine jáne «klıentterge deıin jetkizý» prınsıpi boıynsha kóshirý arqyly ýaqytsha shekteledi. Sonymen birge, qalada qoǵamdyq kólikter de jumysyn toqtatady. 65 jastan asqan azamattarǵa jáne 18 segiz jasqa tolmaǵan azamattar turǵyn úıden eresek adamnyń súıemeldeýinsiz shyǵýyna tyıym salyndy. Bul rette Shymkent qalasynyń polısııa Departamentiniń, Ishki ister Mınıstrliginiń Ulttyq gvardııasynyń, qorǵanys Mınıstrliginiń áskerı qurylymdarynyń kúshterimen karantındik aýmaqty patrýldeý tapsyryldy, - dedi qala ákiminiń orynbasary M. Isahov.
Qoǵamdyq kólikter ýaqytsha toqtatyldy
Bul týraly Shymkent qalasy jolaýshylar kóligi jáne avtomobıl joldary basqarmasy qoǵamdyq kólik bóliminiń basshysy Naýryz Súgirálıev málimdedi.
-Koronavırýs ınfeksııasynyń taralýyna jol bermeý úshin, turǵyndardyń ómirin jáne densaýlyǵyn qorǵaý maqsatynda, 2020 jylǵy 18 sáýirdegi Shymkent qalasynyń Bas memlekettik sanıtarııalyq dárigerdiń №11 Qaýlysyna sáıkes, 2020 jyly 19 sáýirden 1 mamyrǵa deıin qalalyq qoǵamdyq kóliktiń jumysy ýaqytsha toqtatylady, - dedi N. Súgirálıev.
Degenmen, qalada arnaıy tirkelgen 11 taksı kompanııasy jumysyn jalǵastyrady. Olarda 2 adamnan artyq jolaýshy alýǵa bolmaıdy. Tirkelmegen taksı qyzmetine ruqsat etilmeıdi.
Qala ákimi Prezıdentke atqarylǵan jumystardy baıandady
Memleket basshysy Qasym-Jomart Toqaev Shymkent qalasynyń ákimi Murat Áıtenovpen telefon arqyly sóılesti. Talqylaýdyń negizgi taqyryby – koronavrýspen kúres, qazirgi sanıtarlyq-epıdemıologıalyq jaǵdaı jáne aımaqtardaǵy karantındik sharalardyń oryndalýy jaıy aıtyldy. Memleket basshysynyń azamattarǵa áleýmettik kómek kórsetý, shaǵyn jáne orta bıznestiń kezeń-kezeńmen iske qosý, kóktemgi dala jumystary men jumyspen qamtýdyń jol kartasyn iske asyrý týraly tapsyrmalarynyń oryndalýy sóz boldy. Atalǵan másele boıynsha Shymkent qalasynyń ákimi Prezıdentke qazirgi jaǵdaıdy baıanadady.
Murat Dúısenbekuly Memleket basshysyna elimizde tótenshe jaǵdaı jarııalanǵan sátten bastap, birinshi kezekte mıllıondy qala aýmaǵyna 18 sanıtarlyq buǵattaý beketi qoıylǵanyn atap ótti. Ol jerlerde quzyrly organ ókilderinen jasaqtalǵan toptar táýlik boıy úsh aýysymda jumys istep jatqanyn, alǵy sheptegi qyzmetkerler qajetti medısısnalyq kıimdermen tolyq qamtylǵanyn jetkizdi.
Eldegi qalyptasqan jaǵdaıǵa baılanysty 4 sáýirden bastap qala aýmaǵynda karantın jarııalanyp, barlyq saqtyq sharalary kúsheıtilgen.
Qala aýmaǵy tolyqtaı zalalsyzdandyrylýda. Oǵan qosymsha kúsh retinde Memleket basshysynyń jarlyǵymen jasaqtalǵan 100 áskerı mindetti sarbaz da tartylǵan. Shymkentte medısınalyq qorǵanys quraldarynyń máselesi sheshilgen.
О́z sózinde Áıtenov Prezıdentke «О́zińizdiń tapsyrmańyzben qolǵa alynǵan áleýmettik tólem 42,500 teńgeni Shymkentten 225 myń adam aldy. Al «Biz birgemiz» aksııasy negizinde az qamtamasyz etilgen 22 myńǵa jýyq adamǵa 50 myń teńge kóleminde bir rettik kómek berildi», - dedi.
Tótenshe jaǵdaı kezinde kommýnaldyq qyzmet tarıfi tómendedi
Memleket basshysy Qasym-Jomart Toqaev 23 naýryzda tótenshe jaǵdaı kezinde kommýnaldyq qyzmet túrleriniń tarıfin tómendetýdi tapsyrǵan bolatyn. Osyǵan oraı, 2020 jyldyń 1 sáýirinen bastap Shymkent qalasynda kommýnaldyq qyzmetterdiń tarıfteri tómendetilgen.
Shymkent qalasynda kommýnaldyq qyzmet kórsetetin tabıǵı monopolııalar sýbektileri Tótenshe jaǵdaı kezeńinde qala turǵyndarynyń qarjylyq júktemesin tómendetý maqsatynda jáne qoǵamdyq kelisimniń turaqtylyǵynyń mańyzdylyǵyn eskere otyryp, 2020 jyldyń 1 sáýirinen bastap óz bastamasymen tómendegi qyzmetter boıynsha tarıfterdi tómendetý týraly sheshim qabyldady:
1) «Sý resýrstary – Marketıng» JShS:
- sýmen jabdyqtaý qyzmetine tarıf – 88,17 teńgeden 83,75 teńgege deıin (QQS-men birge) nemese 5% -ǵa tómendetildi;
- sý burý qyzmetine tarıf – 35,13 teńgeden 33,38 teńgege deıin (QQS-men birge) nemese 5%-ǵa;
2) «Qýatjylýortalyq-3» MKK:
- ystyq sýmen jabdyqtaý qyzmetine esepteý quraldarymen qamtylmaǵan jeke tulǵalarǵa tarıfi 1 adamǵa 736,53 teńgeden 662,88 teńgege deıin (QQS-men birge) nemese 10% -ǵa tómendetildi;
–esepteý quraldarymen qamtylǵan jeke tulǵalarǵa ystyq sýmen jabdyqtaý qyzmetine tarıf 1 m3-ge 230,16 teńgeden 207,14 teńgege deıin (QQS-men birge) nemese 10% -ǵa;
3) «Taskýdyk Bak» JShS:
- turǵyndar sýmen jabdyqtaý qyzmetine tarıf 70,99 teńgeden
67,44 teńgege deıin (QQS-men birge) nemese 5%-ǵa;
4) «Jenıs T» JShS:
- taýarlyq gazdy tasymaldaý qyzmetine tarıf 3916,82 teńgeden 3720,98 teńgege deıin (QQS-men birge) nemese 5%-ǵa;
5) «Saıram sý» JShS:
- sýmen jabdyqtaý qyzmetine tarıf 72,08 teńgeden 68,48 teńgege deıin (QQS-men birge) nemese 5% -ǵa tómendetildi.
100 áskerı mindetti qyzmetke kiristi
Memleket basshysy Qasym-Jomart Toqaev elimizdegi tótenshe jaǵdaıǵa baılanysty áskerı mindettilerdi arnaıy jıynǵa shaqyrý jónindegi Jarlyq shyǵarǵan bolatyn. Prezıdenttiń bul bastamasyn shymkenttik jastar da shynaıy qoldap, el úshin ter tógýge belderin bekem býyp otyr.
Beıbit kúni áskerge shaqyrtylǵan sarbazdar qalada zalalsyzdandyrý jumysyna qatysady. Oǵan qosa sanıtarlyq buǵattaý beketterine kómekke barady.
«Sarbazdar qaladaǵy 4 aýdanǵa 25-ten bólindi. Olar 13 sáýir men 14 mamyr aralyǵynda zalalsyzdandyrý jumystaryna kómektesedi. Olardy tasymaldaý men tamaq máselesi sheshilgen», - dep atap ótti qala ákiminiń orynbasary Almasbek Keńesbekuly.
Aıta ketetin másele, jumysy bar eriktilerdiń aılyq jalaqysy saqtalady. Eriktiler bundaı qadamǵa paıda úshin emes, Otan úshin barǵanyn aıtty.
Saýda qoımalarynda azyq-túlik jetkilikti
«Nur Otan» partııasy Shymkent qalalyq fılıaly janyndaǵy Partııalyq baqylaý komıssııasynyń músheleri qala turǵyndaryna azyq-túliktiń jetkiliktiligine kóz jetkizý maqsatynda «Sanjar» saýda-logıstıkalyq ortalyǵynyń jumysymen tanysty. Ortalyqta «Sultan», «Marketıng», «Adelına», «Alına-3», «Darıol», «Maslo-Del» JShS-i ornalasqan. Negizinen onda saqtalatyny - azyq-túlik taýarlary. Qazirgi tańda ortalyqqa kúndigine 350-400 tonnanyń kóleminde azyq-túlik ákelinip, taratylýda.
Taýarlar Qazaqstannyń búkil aımaǵynan jáne alys, jaqyn shet memleketterden (Pákistan, Iran, Qytaı, Reseı, Belarýs jáne t.b.) jetkiziledi. Bir ǵana Maslo-Del JShS-i kúndigine 10 tonnaǵa jýyq taýaryn qala turǵyndaryna usynýda jáne iri saýda ortalyqtaryna mekeme ózi jetkizip berip otyrady. Mekeme basshylary elimizde tótenshe jaǵdaı jarııalanǵannan beri ónimderge suranystyń eki ese artqanyn aıtyp otyr.
Shymkentte qurylys qarqyny tómendemeıdi
Tótenshe jaǵdaı kezinde shymkenttegi qurylys qarqyny báseńdemeıdi. Karantın jumysqa qolbaılaý bolmaýy kerek. Barlyq múmkindikti qarastyra otyryp, jumysty júıelegen jón. Qaıta osyndaı sátte ózge óńirlerden kelip, úıinde bos jatqan qolynan is keletin mamandardy kóptep eńbekke tartý jaǵyn qarastyrǵan durys. Degenmen, azamattardyń qaýipsizdigi basty nazarda bolýy tıis.
«Shymkent sıtı» shaǵynaýdanyndaǵy salynyp jatqan kópqabatty turǵyn úılerdiń qurylysyn aralap kórgen qala ákimi Murat Áıtenov osylaı, dedi.
Mıllıondy qala basshysy merdigerlerge qıyn-qystaý kezeńde jumyssyz júrgen azamattardy qurylysqa tartýǵa shaqyrdy. Degenmen jumysshylardyń densaýlyǵyn jiti baqylaýda ustaýdy tapsyrdy. Murat Dúısenbekuly qazirgideı kezeńde kópshilikti óz densaýlyǵy úshin, qaýipsizdigin eskerip, úılerinde otyrýǵa shaqyrdy.
Qala ákimi barǵan nysannyń biri 16 qabatty «Fransýz» stılindegi 4 úı. Qurylysty «Otaý Stroı» kompanııasy júrgizip jatyr.
Bas Injener Abjat Akımovtyń aıtýynsha «360 páterli turǵyn úı jumystarynyń negizgi bólikteri aıaqtalǵan. Qazir ishki jóndeý jáne qas betterin qaptaý jumystary júrip jatyr. Qurylysqa 3 mıllıard 955 mıllıon teńge qaralǵan. Qala aýmaǵynda karantın jarııalanýyna baılanysty shetten kelip jumys isteıtin qyzmetkerlerdiń birqatary kele almaı qalǵan.
Qazir jergilikti azamattardy jumysqa tartý boıynsha ótimder qabyldanyp jatyr. Oǵan qosa qalalyq jumyspen qamtý ortalyǵyna jalpy qala aýmaǵyndaǵy qurylystarǵa qajetti 443 qurylysshy mamanǵa suranym berilgen.
Nysandy aralap kórgen qala ákimi qajetti qurylys materıaldaryn tasymaldaýshy kólikterge qalada júrip turýyna eshqandaı kedergi bolmaý kerektigin atap ótti. Oǵan qosa qajetti qurylys zattaryn satatyn kóterme qoımalarǵa da múmkindik jasalǵanyna toqtaldy. Qurylysshylarmen sóılesken Murat Dúısenbekuly merdigerge turǵyn úıdi, Qala kúnine oraı tapsyrý kerektigin eskertti.
21 864 muqtaj azamatqa 50 myń teńgeden kómek berildi
Shymkent qalasy aýmaǵynda tótenshe jaǵdaıdyń engizilýine baılanysty qala halqynyń osal toptaryna jan-jaqty áleýmettik kómek kórsetý jumystary jalǵasýda.
Elbasynyń bastamasymen qurylǵan «BIRGEMIZ» qoǵamdyq qoryna respýblıka boıynsha túrli kásipkerler men mesenattar qarjy quıyp, osynaý qysyltaıań shaqta elge kómek berýge nıetti ekenin bildirýde.
Osy oraıda «Birgemiz» qorynan 21 864 shymkenttiktiń esepshotyna 50 myń teńgeden bir rettik qarjy aýdaryldy. Bul sanattaǵy I toptaǵy múgedekter, az qamtylǵan otbasylar, eń tómengi zeınetaqy alatyn zeınetkerler, bir sózben aıtqanda qazirgi kezde aýyr jaǵdaıda qalǵan otbasylarǵa qoldaý jasaldy. Kómek qalaǵa qarasty tórt aýdannyń ákimdikteri bekitken tizim boıynsha jasaldy.
Arnaıy tirkeý portaly iske qosyldy
Shymkentte kólikter men azamattardyń qozǵalysyn tirkeıtin portal iske qosyldy. Bul týraly aqparattyq-kommýnıkasııalyq ortalyqta ótken brıfıngte Shymkent qalasy ákiminiń orynbasary Maqsut Isahov aıtty.
-Bekitilgen qaýlyǵa sáıkes, qalada jaıaý júrginshilerge jáne kólik quraldaryna anyqtama arqyly ǵana júrýge ruqsat etilgen bolatyn. Alaıda atalǵan jaǵdaı boıynsha, qalada jalǵan anyqtama arqyly júrgender kóbeıgen, bul polısııa qyzmetkerleriniń tekserisiniń nátıjesinde anyqtalyp otyr. Sol sebepti, qalada qaǵaz júzinde berilgen anyqtamany paıdalaný toqtatyldy. Osy oraıda tájirıbeli kompanııamen kelissóz júrgizilip, kásipkerler men qala turǵyndaryna arnalǵan Shym-karantin.kz veb-saıty iske qosyldy, - dedi qala ákiminiń orynbasary.
Bank bólimshelerinde tártip qatań baqylaýda
Qala aýmaǵyndaǵy «Halyq bank», «Kaspıı bank» jáne «Qazpochta» fılıaldaryndaǵy jaǵdaı qalypty. Qazir bólimshelerden kelýshilerge arnalǵan kútý oryndary daıyndalǵan.
Máselen, Temirlan tas joly boıyndaǵy "Halyq Bank" bólimshesi aldynan kútýshilerge 50 oryndyq qoıyldy. Onda saqtyq sharalary saqtalyp, kútýshiler arasynda araqashyqtyq saqtalǵan.
Al, A.Asqarov kóshesindegi bank bólimshesinde adam kóp bolýyna baılanysty, klıentter kólikpen D.Qonaev kóshesindegi fılıalǵa jetkizildi.
Tótenshe jaǵdaıǵa baılanysty pandemııanyń aldyn alý jumystary arnaıy bekitilgen keste boıynsha atqarylýda.
Shymkentte 1 mıllıon betperde taratylýda
Shymkent qalasyna koronavırýsqa baılanysty «Birgemiz» qoǵamdyq qorynan kelgen 1 mıllıon betperde halyqtyń álsiz toptaryna kiretin otbasylarǵa tegin taratylýda.
Igi sharany júzege asyrý úshin atalǵan qordyń Qamqorshylyq keńesi «SQ-Farmasııa» úkimettik operatorymen Nur-Sultan, Almaty jáne Shymkent qalalary turǵyndarynyń álsiz toptaryna medısınalyq betperdeni tegin taratý úshin 5 mıllıon maska satyp alý týraly shartqa qol qoıǵan bolatyn.
«Nur Otan» partııasy Shymkent qalalyq fılıaly ókilderi Qaınarbulaq, Sáýle, Qoshqarata, Tekesý eldi mekenderi jáne Tereshkova kóshesin aralap, az qamtylǵan otbasylarǵa tegin medısınalyq betperdeler taratty. Sonymen qatar, Kóksaı 2, Kóksaı 3, Jastar 1, Jastar 2 turǵyn alaptary men Temirjol ótkeli turǵyndaryna da maskalar úlestirildi.
Jalpy qala boıynsha partııa belsendileri, «Jas Otan» jastar qanaty músheleri jáne eriktiler tarapynan qazirge deıin 870 myń betperde úlestirildi. Jospar boıynsha endi qalǵan betperdeler shahardyń ózge de shaǵynaýdan turǵyndaryna taratylatyn bolady.
42 500 teńge: 228 813 azamat áleýmettik tólem aldy
Shymkent qalasy boıynsha tótenshe jaǵdaı kezinde áleýmettik tólemdi alý úshin arnaıy portal, saıttardan 471 971 adamnan ótinishter túsken, onyń ishinde 228 223 adamǵa áleýmettik tólem taǵaıyndalǵan. 216 379 adamnyń ótinishteri taǵaıyndalýǵa jatpaıtyndyǵy anyqtalyp keri qaıtarylǵan.
Áleýmettik tólem taǵaıyndalǵan 228 223 adamnyń 215 674 adamy ótinishter boıynsha, 12 549 adam proaktıvti túrde taǵaıyndalyp, 208 813 adamyna 42 500 teńgeden áleýmettik tólem tólengen.
Kepildendirilgen áleýmettik kómek berilýde
Shymkent qalasy, Eńbekshi aýdany boıynsha az qamtylǵan otbasylarǵa «Magnum» saýda jelisi arqyly kepildendirilgen áleýmettik kómek taratylýda. Ataýly áleýmettik kómek alatyn turǵyndar járdemaqydan bólek memleket tarapynan azyq-túlikter men gıgıenalyq zattar jıyntyǵyn tegin alýda. Aýdan ákimi Ǵalymjan Ilıasovtyń aıtýynsha, 301 myń turǵyny bar Eńbekshi aýdanynda 62 myńnan astam otbasy 20 shaǵynaýdan men 16 turǵyn alabynda turady.
–Osylardyń arasynan 2368 otbasy kepildendirilgen áleýmettik kómekke qol jetkize alady. Búgingi deıin atalǵan pakettiń myńǵa jýyǵy taratyldy, - deıdi Ǵ.Moldabaıuly.
Karantın talaptaryn qatań saqtaǵan jaýaptylar qajetti shekteý sharalaryn eskerip, arnaıy kezekshilik uıymdastyryp, saýda jelisine kelýshilerdiń jaǵdaıyn jiti baqylaýǵa alǵan.
Aıta keteıik, kepildendirilgen áleýmettik kómekti ataýly áleýmettik kómek alatyn turǵyndar «Magnum» saýda jelisinen alady. Al tıesili azyq-túlik kómegine kezek kútpeı qol jetkizgisi keletinder saýda jelisiniń saıtyna kirip, jeke sáıkestendirý nómirin (JSN) engizý arqyly jıyntyqty atalǵan saýda jelisiniń kez kelgen núktesinen alýyna bolady.
#BIZBIRGEMIZ: 1900-den astam otbasyǵa kómek kórsetildi
Elbasy, «Nur Otan» partııasy Tóraǵasy N.Á.Nazarbaevtyń Úndeýine oraı elimizde bastaý alǵan «Biz birgemiz!» respýblıkalyq aksııasy aıasynda Shymkentte járdemge asa muqtaj 1900-den astam otbasyǵa sanıtarlyq qorǵaný jıyntyqtary jáne birinshi kezekte qajetti ónimder men azyq-túlik tapsyryldy. Igi iske "Nur Otan" partııasy belsendileri, «Jas Otan» jastar qanatynyń ókilderi men eriktiler atsalysty.
Aksııa aıasynda "Nur Otan" partııasynyń belsendi múshesi, «Ordabasy» ındýstrıaldy aımaqtyń dırektory Rysbek Bertaev Shymkenttegi 200 az qamtylǵan otbasyǵa kómek kórsetti. Sondaı-aq qaladaǵy 1 Mamyr kóshesi 22/2 mekenjaıy boıynsha ornalasqan Beıimdeý ortalyǵanda 50 qandastar otbasyna azyq-túlik jıyntyqtary men gıgıenalyq zattar tabystaldy.
Sonymen qatar, eriktiler saqtaný sharalaryn ustana otyryp, «baılanyssyz» tásilmen sanıtarlyq qorǵaný jıyntyqtary jáne birinshi kezekte qajetti ónimder men azyq-túlikti 150 jaǵdaıy nashar jetim balalardyń otbasyna jetkizdi.
Júk kólikteriniń qalaǵa kirip-shyǵýyna kedergi joq
Bul týraly aqparattyq-kommýnıkasııalyq ortalyqta ótken brıfıngte Shymkent qalasy ákiminiń orynbasary Maqsut Isahov málim etti.
Maqsut Pernebaıulynyń aıtýynsha, Shymkent qalasynyń Bas memlekettik sanıtarııalyq dárigeriniń qaýlysyna sáıkes, júk kólikteriniń qalaǵa kirip-shyǵýdyń arnaıy erejesi bar. Qala kireberisterindegi barlyq beketterde «Jasyl dáliz» uıymdastyrylǵan. Ol jerden tirshilikti qamtamasyz etetin kólikter, azyq-túlik tasymaldaýshy mashınalar men tranzıttik júk kólikteri, sondaı-aq, basqa da arnaıy tehnıkalar kedergisiz ótedi.
-Shymkent qalasynyń aýmaǵynda tótenshe jaǵdaıdyń engizilýine baılanysty júk tranzıttik avtomobılderin, sondaı-aq qala muqtajy úshin azyq-túlik taýarlaryn tasymaldaıtyn júk avtomobılderine ruqsat berilgen. Degenmen, jeńil kólikpen kirýge bolmaıdy. Karantın talaptaryn oryndap, bazaǵa engizilgen kásip ıeleri az emes. Eger, sharýa qojalyqtaryna, jylyjaılarǵa qajetti zattar alý úshin qaladan shyqqan jaǵdaıda, qaıta kirýge tek júk kóligine ǵana ruqsat beriledi, - dedi qala ákiminiń orynbasary.
Erejege sáıkes, azyq-túlik taýarlaryn júk kóligimen tasymaldaý: tek júk kóligi; kólik quraldaryn tıegen nemese bos; júrgizýshi jáne eki jolaýshydan artyq bolmaýy tıis. Máselen, olar qurylys materıaldaryn, janar-jaǵar maı, tuqym, kóshetter, aýyl sharýashylyǵyna qajetti tyńaıtqyshtardy tasymaldaýy múmkin. Bul rette júk kólikteriniń qaladan shyǵýyna kedergi joq.
Saýda oryndaryna dezınfeksııalyq ótkelder ornatylýda
Qala turǵyndarynyń qaýipsizdigin qamtamasyz etý úshin Shymkentte dezınfeksııalyq ótkelder ornatyla bastady.
Mundaı qondyrǵy Qazybek (Dýlatı kóshesi boıyndaǵy) azyq-túlik bazarynyń kireberisine ornatyldy. Jaqyn kúnderi dezınfeksııalyq ótkelder «Akbar», «Jabyq bazar» sekildi iri saýda oryndaryna da qoıylatyn bolady.
Osy rette qala ákimdigi barlyq kásipkerlerdi satyp alýshylardyń qaýipsizdigin qamtamasyz etý maqsatynda óz nysandarynda osyndaı zalalsyzdandyrý qondyrǵylaryn ornatýǵa shaqyrady. Bul turǵyndar arasynda qaýipti indettiń taralýynyń aldyn alýdaǵy sharalardyń biri.
Búginge deıin qaladaǵy 4 aýdanda zalalsyzdandyrý jumystary qarqyndy júrýde. Shymkentte bul baǵyttaǵy is-sharalar karantın aıaqtalǵansha júıeli jalǵasady. Dezınfeksııalaý qala kóshelerinde, kópqabatty úılerde, aýlalarda jáne jaıaý júrginshiler joldary men aıaldamalar syndy qoǵamdyq oryndarda atqarylýda.
Koronavırýstan 9 adam saýyǵyp, úıine shyǵaryldy
Shymkentte koronavırýsqa shaldyqqan bir otbasydan 9 azamat saýyǵyp, úıine shyǵaryldy. Dertinen saýyqqandar - 2 bala, olardyń bireýi - 1 jasqa deıingi bala, jeteýi - eresek. Aýrýhanadan shyǵarylǵan pasıentterdiń zerthanalyq zertteýleri teris nátıje kórsetti, densaýlyq jaǵdaılary jaqsarǵan.
Aıta keteıik, aýrýynan saýyǵyp shyqqan naýqastar medısınalyq qyzmetkerlerdiń ýaqytyly kómek kórsetýiniń arqasynda emdeldi. Osyǵan baılanysty Shymkentte karantın 3 oshaqtan alyndy. Olar: Taımanov kóshesi, Tórequlov kóshesi jáne Maqtaly kóshesi.
Shymkent