Memlekettik komıssııanyń sheshimine sáıkes 20 sáýir, ıaǵnı búgingi kúnnen bastap Almaty qalasyndaǵy saqtyq talaptaryna saı dep tanylǵan kásiporyndar óz jumysyn bastady.
Qaladaǵy birqatar ónerkásiptik kásiporyndardyń, qurylys kompanııalarynyń, sondaı-aq aldyn ala jazylý boıynsha notarıýstardyń jáne Naýryzbaı aýdanyndaǵy HQKO bir bólimshesiniń (tek qana bızneske qyzmet kórsetý úshin) qyzmetke kirisýine ruqsat berildi.
Shaharda jumyspen qamtylǵandardyń jalpy sany birtindep ósip, aı kóleminde taǵy da 90 myń adamǵa kóbeımek. Kásiporyndardy iske qosý isi de jumys ereksheligine baılanysty, kezeń-kezeńmen júzege asatyn bolady.
Basqa da kásiporyndardy iske qosý tek aýdıt júrgizilgennen keıin jáne ujymdardyń daıyndyǵy men sanıtarlyq-epıdemıologııalyq talaptarǵa sáıkestigi týraly oń sheshim shyǵarylǵannan keıin ǵana múmkin bolady.
Aýdıtti jergilikti atqarýshy organdardyń ókilderinen, SES jáne «Atameken» UKP qyzmetkerlerinen turatyn jumys toptary júrgizetin bolady. Sondaı-aq iske qosylǵannan keıin jumys istep turǵan kásiporyndar arnaýly monıtorıngtan ótip, talaptar saqtalmaǵan jaǵdaıda, qyzmetin toqtatýy múmkin.
Qyzmetkerlerdi COVID-19 ınfeksııasynan qorǵaý jónindegi is-sharalardyń tolyq tizbesi qalanyń barlyq ónerkásip jáne qurylys nysandary úshin ázirlendi. Jumys berýshiler qatań sanıtarlyq normalardyń saqtalýyna derbes jaýapkershilikte bolady. Sonymen qatar, nysandarda qyzmetkerlerdiń jaı-kúıine saýalnama júrgizip jáne olardy jýrnalǵa tirkeı otyryp, sondaı-aq teplovızorlardyń kómegimen baılanyssyz termometrııa arqyly kúndelikti aýysym aldyndaǵy medısınalyq tekserý júrgizý talap etiledi. Barlyq qyzmetkerlerdi medısınalyq maskalarmen jáne qolǵaptarmen, dezınfeksııalaýshy maılyqtarmen nemese teri antıseptıkterimen, sanıtaızerlermen qamtamasyz etý qajet.