Túrkistan oblysy Jetisaı aýdandyq polısııa bóliminiń qyzmetkerleri tótenshe jaǵdaı kezindegi quqyqbuzýshylyqtardyń aldyn alý jáne jolyn kesý maqsatynda reıdtik is-sharalar júrgizgen.
Osyndaı reıd barysynda tártip saqshylary qala kósheleriniń qıylysynda «Mersedes-bens» avtokóligin toqtatady. Qujattardy talap etý kezinde júrgizýshi tártipke baǵynbaı, aldynda turǵan eki polıseıdi soǵyp, kóliktiń esiginiń janynda turǵan úshinshi polıseıdi avtokóligimen súıreı ótip, oqıǵa ornynan izin sýytqan. Úsh polısııa qyzmetkeri jaraqat alyp, olarǵa medısınalyq kómek kórsetildi.
Jedel-izdestirý is-sharasy nátıjesindepolısııa qyzmetkerleri izin sýytpaı, Jetisaı qalasynyń turǵynyn quryqtady. Medısınalyq kýálandyrýǵa sáıkes tártip buzýshynyń «ortasha dárejede» mas bolǵany jáne esirtki qoldanǵany anyqtaldy. Atalǵan jaıt Qazaqstan Respýblıkasynyń QK-niń 379-baby «Bılik ókiline baǵynbaý» jáne 380-baby «Bılik ókiline qatysty kúsh qoldaný» boıynsha tirkeldi. Kúdikti qamaýǵa alynyp, avtokóligi aıypturaǵyna qoıyldy. Qazirgi ýaqytta atalǵan jaıt boıynsha sotqa deıingi tergeý amaldary júrgizilýde.