Qazaqstan Respýblıkasynyń Tuńǵysh Prezıdenti – Elbasynyń «Birlese bilgen el bárin jeńedi» atty maqalasy búkil álem pandemııaǵa qarsy kúresip jatqan qıyn sátte Qazaqstan halqyn birlikke úndeıdi.
Nursultan Nazarbaevtyń «Bereke-birliktiń almaıtyn qamaly, baǵyndyrmaıtyn bıigi bolmaıdy», dep elimizdi birlikke shaqyrǵan sózderi, tek elimiz ǵana emes, barsha álem daǵdarysqa ushyraǵan qıyn-qystaý kezeńde boıymyzǵa rýhanı kúsh darytyp, júregimizge senim uıalatty. Ult kóshbasshysynyń qoldaý kórsetken aq tileýli sózderi, óz halqyna jáne onyń úzdik qadir-qasıetterine degen senimi qazaqstandyqtarǵa rýhanı demeý bolyp, qýat beredi. Osynaý qysyltaıań kezeńde bir-birimizge qamqor bolyp, bir jaǵadan bas, bir jeńnen qol shyǵaryp, aýyzbirshilik kórsetýdiń qanshalyqty mańyzdy ekenine kózimiz taǵy da jetip otyr. Egemendikke qol jetkizgen jas memleketimizdiń qalyptasý jolynda birlik pen yntymaqtyń arqasynda talaı bıikterdi baǵyndyrdyq, qazir, mine qıyndyqtardy jeńip shyǵý úshin bar kúsh-jigerimizdi biriktirý qajet.
Elbasynyń júrekjardy úndeýi bizge senimdilik uıalatyp, tózimdiligimizdi nyǵaıtady. Biz óz kúshimizge senemiz jáne osy aýyrtpashylyqtardan moıymaı ótýge umtylamyz. Jahandyq álemniń erteńgi kúnine úmitpen qaraımyz, sebebi bárimizge tóngen ortaq qaýipti birigip eńserýge barlyq múmkindik bar, álemniń alpaýyt memleketteri, saıyp kelgende bir-birin jaý sanamaı, senimdi seriktes retinde tanıtyny sózsiz.
Tuńǵysh Prezıdenttiń maqalasy beıbitshilik pen kelisimniń qundylyǵy, týǵan elimizdiń amandyǵy men tynyshtyǵy - osy uly syıdy kózimizdiń qarashyǵyndaı saqtaý qajettiligi týraly oıymyzdy bekite tústi.
Úreıge boı aldyryp, baıbalam salýdan aýlaq bolýymyz kerek. Týǵan halqymyzǵa degen eldigimizdi dáleldeýdiń senimdi joly – otandastarymyzdyń ıgiligi úshin naqty ıgi ister atqarý.
Kez kelgen daǵdarys bir sátke toqtap, baǵa jetpes qazyna – óz ómirimizdi nege jumsap júrgenimiz týraly oılanýǵa múmkindik beredi. Bul - jańǵyrý kezeńi. Elbasynyń sózderi oıymyzdy túbegeıli ózgertýge, jańa syndarǵa beıimdelip, tyǵyryqtan shyǵatyn jol izdeýge silteıdi.
О́ner qashanda álemdegi elderdi, ártúrli ulttar men din ókilderin biriktirýshi kúsh retinde álemdi tanyp bilý quraly bolyp keledi. Shyǵarmashylyq ókilderi retinde, biz bolyp jatqan oqıǵalardy jiti sezinip, ózimizge júktelgen ónerdiń izgi mindetin barynsha sezinemiz. Álemdik klassıkalyq balet dástúrlerin saqtap, halqymyzdyń ulttyq-mádenı murasyn negizge alǵan Qazaq ulttyq horeografııa akademııasynyń ujymy, Otanǵa degen rızashylyǵy men súıispenshiligin bildire otyryp, qoǵamnyń rýhanı-estetıkalyq damýy úshin eńbek etedi.
Jas memleketimizdiń qalyptasý tarıhynda Qazaqstan halqy bereke-birlik pen tózimdiliktiń arqasynda talaı dúrbeleń kezeńderdi bastan ótkergen mysaldar az emes. Búgingi tańda el basshylyǵy halqymyzdyń amandyǵy men ıgiligi úshin jan-jaqty sharalar qabyldaýda, sonymen birge árbir azamattyń jeke jaýapkershiligi de mańyzdy bolyp otyr. Elbasy men Memleket basshysynyń jol kórsetýimen bir-birimizdi ózara qoldap, aýyzbirshilik tanytý osy aýyr synaqtardy eńserýge jáne elimizdiń jańa jetistikterge jetip, ósip órkendeýine septigin tıgizetini sózsiz.
Bıbigúl Núsipjanova,
Qazaq ulttyq horeografııa akademııasynyń
birinshi prorektory