QR Sybaılas jemqorlyqqa qarsy is-qımyl agenttigi Aqmola oblystyq departamentiniń tergeý basqarmasy qyzmetkerleriniń tótenshe jaǵdaı rejımin buzý faktisi boıynsha qyzmettik tekserý júrgizdi, dep habarlaıdy QazAqparat.
Agenttik málimetinshe, atalǵan basqarmanyń basshysy R.Turǵambekovtiń jáne oǵan baǵynyshty tergeýshiler N.Myrzageldınniń, A.Qaǵarmannyń, J.Aqmoldınniń, B.Luqmanovtyń tótenshe jaǵdaı rejıminiń qazirgi shekteýlerine qaramastan, keshki demalysty Kókshetaýdaǵy monsha keshenderiniń birinde ótkizgeni anyqtalǵan.
«Osyǵan baılanysty 20 sáýirde agenttiktiń ortalyq apparatynyń tártiptik komıssııasy otyrysy ótti. Oqıǵanyń barlyq jaǵdaılaryn jáne ádilettilik, parasattylyq, senim qundylyqtaryn qatań saqtaýdy eskere otyryp, agenttik tóraǵasynyń buıryǵymen atalǵan qyzmetkerler keleshekte memlekettik ári quqyq qorǵaý organdarynda jumys isteý quqyǵynsyz jaǵymsyz sebepter boıynsha jumystan bosatyldy», - delingen taratylǵan aqparatta.
Sonymen qatar tártiptik komıssııanyń usynysy boıynsha oblystyq departament basshysy M.Tóleýbaev jeke qurammen aldyn alý jumysyn nashar uıymdastyrǵany úshin qyzmetine tolyq sáıkes emestigi túrinde jaýapqa tartyldy.
«Sybaılas jemqorlyqqa qarsy is-qımyl agenttigi óz áriptesteriniń teris qylyqtarynyń saldaryn túsine otyryp, azamattardyń karantın rejımin saqtaý kezindegi jaýapkershiligin moıyndap qurmetteı kele, oryn alǵan jaǵdaı úshin shynaıy keshirim suraıdy jáne árbir qyzmetkerdiń ataǵy men dárejesine qaramastan zań buzýshylyq faktisi úshin jazanyń bultartpastyǵyna kepildik beredi», - dedi vedomstvodan.