Elorda turǵyndarynyń úılerine jylý berý 21 sáýirde toqtatylady. Bul týraly elorda ákimdiginiń resmı saıty habarlady.
«Nur – Sultan qalasynda jylytý maýsymy 2019 jyldyń 30 qyrkúıeginde bastalyp, 2020 jyldyń 21 sáýirine deıin sozylyp, 205 kúndi qurady. Jylytý maýsymyn aıaqtaý erteńge josparlanǵan», – dedi Nur-Sultan qalalyq otyn-energetıka kesheni jáne kommýnaldyq sharýashylyq basqarmasynyń basshysy Ernat Bazıl búgin brıfıngte.
Onyń aıtýynsha, esepti kezeńde energııa kózderinde, jylý jáne elektr jelilerinde avarııalyq ajyratýlar men birinshi dárejeli isten shyǵýlar tirkelgen joq.
Esterińizge sala keteıik, Nur-Sultan qalasynda jylytý maýsymyna daıyndyq jáne ony ótkizý erejelerine sáıkes, aýanyń ortasha temperatýrasy bes táýlik boıy 10°C jáne odan joǵary bolsa, jylytý maýsymyn aıaqtaý týraly sheshim qabyldanady.
«Astana-Energııa» AQ boıynsha jylytý maýsymy kezeńinde 2 234 mln kVt saǵat elektr energııasy jáne 6 122 myń Gkal jylý energııasy óndirildi. Qalanyń energııa kózderinde 2 767 myń tonna kómir (37 437 vagon), 5 226 myń tonna mazýt (87 sısterna) jumsaldy. Jylý berý maýsymyn ótkizý kezeńinde jylý energııasynyń eń joǵarǵy bosatylýy 2020 jyldyń 29 qańtarynda tirkelip, 2 168 Gkal/saǵatty qurady. Elektr júktemesiniń maksımýmy 2019 jyldyń 21 qarashasynda tirkeldi jáne 676 MVt/saǵatty qurady. JEO-2 kózindegi shınalardan bosatý 303 MVt/saǵatty qurady, aıyrmany óteý úshin (373 MVt/saǵat) syrtqy kózderden elektr enerııasy satyp alyndy», – dedi E.Bazıl.
Sonymen qatar ol «Astana-О́EK» AQ boıynsha jylý berý maýsymynda elektr energııasyn jeliler arqyly tasymaldaý kólemi – 2 163 mln kVt saǵatty quraǵanyn atap ótti. Bul ótken jylmen salystyrǵanda 1%-ǵa az ekenin atap ótti. О́tken jylytý maýsymynda «Astana-Teplotranzıt» AQ 5 527 myń Gkal kóleminde jylý energııasyn berýdi jáne taratýdy qamtamasyz etti. Bul ótken jylmen salystyrǵanda 2,6%-ǵa tómen.