Almaty oblysynda koronavırýstan emdelip, aýrýhanadan shyqqan naýqastar qatary kóbeıip keledi. Bul jaǵymdy habar el kóńilin ornyqtyryp, juqpaly indetpen kúresý jumystarynyń joǵary deńgeıde ekenin kórsetti. Iаǵnı, aımaqtaǵy aq jeleńdi abzal jandardyń janqııarlyq eńbegi men bilim-biliginiń, tájirıbesiniń arqasynda bul dertti aýyzdyqtaýdyń múmkindigi ulǵaıa tústi.
Jetisý jerindegi juqpaly indettiń alǵashqy oshaǵy Qarasaı aýdanynan anyqtalǵan bolatyn. 21 naýryz kúni Stambul – Bishkek baǵytyndaǵy áýe reısi arqyly Mekkeden ushyp kelgen jolaýshydan koronavırýs anyqtalyp, ol Qaskeleńdegi juqpaly aýrýlar aýrýhanasyna oqshaýlanǵan edi. Sol kúnnen bastap Qarasaı aýdanynyń dárigerleri daýasyz derttiń quryǵyna ilingen adamnyń ómiri úshin kúres bastaǵan. Dárigerlerdiń kásibı qyzmetiniń arqasynda naýqastyń beti beri qarap, sáýirdiń ony kúni oǵan aýrýhanadan shyǵýǵa ruhsat berildi. Bul oblystaǵy koronavırýstan aıyqqan alǵashqy pasıent edi. Onyń izin ala jaqsy habar taraı bastady. Qazir Qaskeleńdegi aýrýhanadan emdelip shyqqan naýqas sany mezgil saıyn kóbeıip keledi.
- Qarasaı aýdanynyń juqpaly indet oshaǵyna aınalǵanyn bilesiz, bul bir mazasyz, táýekeli kóp mezgil boldy. Biraq, biz moıymadyq. Antymyzǵa adal boldyq, múmkindikti qalt jibermedik. Nátıjesinde koronavırýs juqtyrǵan adamdar dertten aıyǵa bastady. Alǵashqy naýqastyń jaǵdaıy ońala bastaǵanda áriptesteriminiń úı betin kórmeı, uıqysyz júrip istegen jumysytarynyń beker ketpegenin uǵyp, qýandym. Aýyrǵan adamnan qaıta-qaıta analız alyp, jiti tekserdik. Nátıjesi jaqsy bolyp, ony aýrýhanadan shyǵarýǵa sheshim qabyldadyq. Bul bizdiń ǵana emes, tutas oblystaǵy medısına mamandarynyń jeńisi boldy. Endi mundaı jaǵymdy jańalyq jıi estilip tur. Sońǵy kúnderde aýrýhanadan birneshe naýqasty shyǵaryp, em-domdy úılerinde jasap, kútinýge jiberdik, - deıdi Qarasaı aýdandyq ortalyq aýrýhanasy juqpaly aýrýlar bóliminiń meńgerýshisi, ınfeksıonıst dáriger Sáýle Baraqbaeva.
Almaty obylysy dárigerleriniń dertpen kúresýdegi damylsyz is-áreketiniń jemisti bolýy úlken jetistikke balanýda. Bul aımaqtaǵy indet taralýynyń aldyn alý men kúresý sharasyna serpin berip, medısına qyzmetkerleriniń eńbegine laıyqty baǵa berýge de jol ashty. Qazir oblysta Prezıdent Qasym-Jomart Toqaevtyń tapsyrmasyna oraı qaýippen betbe-bet kelip otyrǵan dárigerlerge qarjylaı ótemaqy tóleý júzege asyp jatyr. Osy maqsatqa respýblıkalyq bıýdjetten bólingen qarajat esebinen 1448 medısına qyzmetkerine, onyń ishinde 205 dáriger men 882 orta medısınalyq qyzmetkerge, jáne 361 kishi medısınalyq qyzmetkerge qosymsha eńbekaqy berilgen eken. Sondaı-aq, jergilikti bıýdjetten aımaqtaǵy 1 023 medısına qyzmetkerine syıaqy taǵaıyndaldy. Endigi oblystaǵy 178 dáriger, 528 orta medısınalyq qyzmetker men 317 kishi medısınalyq qyzmetker bul qarjyǵa ıe boldy.
- Árıne, bizdiń janqııarlyq jumysymyzdy baǵalap, indetpen kúreste alǵy shepte júrgen áriptesterimdi yntalandyryp jatqan sharaǵa, memlekettik qoldaýǵa dán rızamyz. О́kinishke qaraı, dárigerlerdiń arasynda da indet juqtyrýy deregi boldy. Bul koronavırýstyń eshkimdi aıamaıtyn aýyr indet ekenin kórsetti, ıaǵnı, adamdardyń karantın erejesin buzbaı, úıden shyqpaı otyrǵany bizge de úlken kómek bolar edi. О́ıtkeni, dáriger úshin naýqasty emdeý mindet bolǵanymen, adamdardyń múldem aýyrmaǵany mańyzdy. Mysaly, bizdiń aýrýhanadan jaqynda 70 jastaǵy pasıent indetten aıyǵyp shyqty. Aldynda «Asyl Arman» turǵyn úı kesheninen kelgen aıaǵy aýyr áıeldi oqshaýladyq. Ol da saýyǵyp, úıine bardy. Qazir júkti kelinshshek bizdiń baqylaýymyzda. Bolashaq ananyń da, ishtegi náresteniń jaǵdaıy jaqsy. Mine, medısına qyzmetkeri úshin naǵyz mártebeli sát osy, - deıdi ınfeksıonıst dáriger Sáýle Baraqbaeva.