Densaýlyq saqtaý mınıstri Eljan Birtanov pen vedomstvo qyzmetkerleri koronavırýsqa test tapsyrady. Bul týraly mınıstrliktiń resmı ókili Dıas Ahmetshárip málimdedi.
«30 naýryzdan bastap Densaýlyq saqtaý mınıstrligi tolyqtaı qashyqtan jumysqa kóshken bolatyn. Sondyqtan, mınıstrlik ishinde dert juqtyrý qaýpi az. Qyzmetkerlerdiń 90 paıyzy úıden jumys isteýde. Jumysta mınıstrdiń ózi jáne 3-4 adam ǵana qaldy. Olardyń da árqaısysy jeke kabınette bolǵandyqtan, juqtyrý qaýpi az degen oıdamyz. Degenmen, búgin mınıstr Eljan Birtanov koronavırýs ınfeksııasyna test tapsyrady. Nátıjesi shyqqan soń, habarlaımyz», - dedi Dıas Ahmetshárip.
Onyń aıtýynsha, qazir Densaýlyq saqtaý vıse-mınıstri bolǵan Kamaljan Nadyrovpen baılanysta bolǵandar anyqtalyp jatyr.
«Sońǵy kúnderi Kamaljan Nadyrov mınıstr tapsyrmasymen Almaty oblysynda boldy. Almaty qalasynda emhanadan aýrý oshaǵy shyǵyp, dárigerlerdiń arasynda túsinispeýshilik týǵanda da, Kamaljan Nadyrov barǵan edi. Árıne, qorǵanys kıimin kıip, barlyq talaptardy saqtady. Degenmen, aýrýdyń kimnen, qaı jerden juqqanyn anyqtaýymyz qajet. Ol kisi qazir qaı kúni qaıda bolǵanyn, kimmen kezdeskenin tizbektep jazyp otyr. Baılanysta bolǵan barlyq adamdarǵa PTR arqyly dıagnostıka jasalady», - dedi ol.
Eske sala keteıik, Densaýlyq saqtaý vıse-mınıstri bolǵan Kamaljan Nadyrov koronavırýs ınfeksııasyn juqtyryp, aýrýhanaǵa jatqyzyldy. Ol Almaty qalasy Densaýlyq saqtaý basqarmasynyń basshysy qyzmetine kirisýi kerek edi.