Nur-Sultan qalasynda №1, №2 balalar aýrýhanalary men ortalyq jol aýrýhanasynyń aýmaǵynda dezınfeksııalyq keshender ornatyldy. Qaladaǵy alǵashqy dezınfeksııalyq keshen №3 kópbeıindi balalar aýrýhanasynda ornatylǵan bolatyn.
Dezınfeksııalyq keshen medısınalyq qyzmetkerler men kelýshilerdiń kıimderinen qaýipti patogenderdi joıýǵa múmkindik beredi.
«Qondyrǵy bý generatorlarynyń kómegimen jumys isteıdi. Dezınfeksııalaý quraldary bar bý shyǵaratyn arnaıy motorlar bar. Bul keshen arqyly ótý kıimniń bar qyrtysyndaǵy qaýipti patogenderdi joıýǵa múmkindik beredi. Qondyrǵyny medısına qyzmetkerleri kúnine eki ret, jumysqa shyqqanda jáne aýysym aıaqtalǵan soń paıdalanady. Naýqastar da osy keshen arqyly óte alady. Jalpy osyndaı 10 dezınfeksııalyq keshen bar», - dedi qyzmet kórsetýshi uıym ókilderi.
Jaqyn arada basqa medısına mekemelerinde jáne adam kóp jınalatyn oryndarda osyndaı dezınfeksııalyq tonnelder ornatylady. Elorda emhanalarynda koronavırýs ınfeksııasynyń belgilerin tekserý úshin teplovızorlar ornatyldy. Temperatýrany ólsheýge arnalǵan qurylǵylar kire beriste ornalasqan. Kelýshiler men dárigerlerdiń dene qyzýy joǵary bolǵan jaǵdaıda mehanızm birden belgi beredi. Teplovızorlar jeke demeýshi, bıznesmen Nurlan Smaǵulovtyń qoldaýymen ornatyldy. Elorda ákimdigi kórsetilgen kómek úshin alǵys bildiredi.