Reseıde oqıtyn stýdentter elge oraldy

Koronavırýs pandemııasyna baılanysty kóptegen el qaq­palaryn tars jaýyp, ári-beri qatynaýdyń birshama qıyn­dap qalǵany ras. Osyndaı qy­syl­taıań sátte syrtta júrgen keı­bir stýdentterimiz Otanyna orala almaı qaldy. Árıne ár qazaqstandyqtyń qaı jerde bolsa da eline qaıtyp oralýyna qu­qy bar. Kimge kelýge bolatynyn, kimge kelýge bolmaıtynyn olar ózderi sheshse kerek. Bul oraıda Qazaqstan Úkimeti ártúr­li maqsatpen shet memleketter­ge shyqqan azamattaryn elge jet­kizip alý isine joǵary mán berip otyr. Onyń ishinde ásirese shetel oqý oryndarynda bilim alyp jatqan stýdentterdiń jaǵdaıyn bir sát te nazardan tys qaldyrǵan emes. Iаǵnı Qazaqstan óz azamat­tarynyń elge oralýy úshin qol­dan kelgenniń bárin jasaýda.

Mine, osy aptada Reseıdiń Máskeý jáne Sankt-Peterbýrg qala­lar­yndaǵy joǵary oqý oryn­­­­darynda oqıtyn qazaq­stan­dyq stýdentter elge qaıt­ty. Naq­tyraq aıtsaq, 21 sáýir kúni tańer­teń Máskeýdegi Qazaq­stan Respýb­lı­kasynyń el­shi­ligi ǵımara­ty­nyń aldynan bes avtobýs jolǵa shyqty. Avto­býstarda koronavırýs pandemııa­syna baılanysty Re­seı­den shyǵyp úlgermegen 250-den as­tam qazaqstandyq stýdent bar.

Kólikke minerde stýdentterdiń barlyǵynyń dene qyzýy ólshendi. Reseı Federasııasy Jol qoz­ǵalysy qaýipsizdigi memlekettik ınspeksııasy jáne Qazaqstan el­shiligi qyzmetkerleriniń bastaýy­men barlyq sanıtarlyq talaptar saqtala otyryp, avtobýstar qazaq-reseı shekarasyna qaraı bet aldy. Shekaradan ót­kennen keıin Or jáne Álimbet ótki­zý beketterinde jastardy Aq­tóbe oblysy ákimdiginiń ókilderi kútip alady. Týǵan elge qadam bas­qan jastardyń barlyǵynan koronavırýsqa baılanysty test alynatyn bolady.