Nazgúldiń nurly álemi

Adamnyń alǵa qoıǵan maqsat-mu­ra­ty keı sátte ózgeshe óris taýyp, óz­ge­­­rip jatady eken. Ońynan ózgerse quba-qup. Nazgúl Tólepbergenqyzy 2004 jyly Nur-Sultan qalasyndaǵy L.N.Gýmılev atyndaǵy Eýrazııa ulttyq ýnıversıtetiniń ekonomıka fakýl­te­tin úzdik aıaqtady. Aldynan sara jol ashylyp turǵanyn baıqaǵan ol, jolynyń ońǵarylatynyna da ishteı senimi mol edi. Bir kezde armandaı alys jaǵalaýdyń búgingi kúni jaqyndaı túskenin sezetin. Olaı bolmaǵanda she? Oqytýshylar da ta­lant­­ty shákirtiniń alysqa baratyny­na bek senimdi. At-túıedeı qalap ka­fed­­rada jumys isteýge shaqyrdy. Jul­­dyzy jarqyrap turǵan Nazgúl Tólep­ber­gen­qy­zy tárizdi bilimi tas jaratyn talantty shákirtter sırek qoı. Kafedrada jumys istep júrgen kezinde ekonomıka men qarjy salasynyń jilik maıyn shaǵyp, ádistemelik nusqaýlyqtar jazdy. Oqý-quraldarynyń avtory atandy. О́ıtkeni kez kelgendi baqshasyna túsirmeıtin qıyn ǵylymnyń qyr-syryn qapysyz meńgerýdi tulymy jelbiregen shaqtan beri armandaıtyn. Qanshama ýaqytyn osy ǵylymdy meńgerýge jumsady. Kembrıdj qalasynda da bilim tájirıbesin baıytty. 2009 jyly magıstr atandy. Ǵulamalar jazyp ketken qalyńdyǵy kereqarys oqýlyqtardy, ǵylymı zertteýlerdi, túrli boljamdar men ádistemelerdi basyna jastap jatty dese de bolady. Endi óz bilgenin, tal boıyna jınaǵan tamasha baılyqtyń biri bilim – keıingi kemel jastyń súıegine sińirse, maqsaty oryndalardaı.

Mynaý jaryq dúnıede talǵamnyń tynysyn tamyrshydaı tap basý múmkin emes eken. Jyldar boıy bar kúsh-jigerin, qajyr-qaıratyn aıamaı jumsap, bir bıigine taban tiregen alǵashqy ma­man­dyǵyn balalarmen jumys is­teý­ge almastyrǵan. Nazgúl Tólepbergenqyzyna – bul bir qyzyldy-ja­syl­dy qyzyǵymen kóńil arbaıtyn, ár kúni shattyqqa toly, árqaısysy áli ashylmaǵan araldaı nurly álem eken. Et júregi ińkár sezimge toly jas ǵalym sábı sezim shúpildegen erte­gideı ǵajaıyp ólkeniń óz tynysyn, óz lebin solaı sezingen. Jaratqan ıem-aý, myna dúnıede sábıdiń kúlkisinen, byl­dyr­la­ǵan úninen, ýyljyǵan dıdarynan, qyzyǵyna toıdyrmas qımylynan artyq ne bar eken?! Tek osy álemniń kináratyn kórgende qolynan kelse, qyrtysyn jazyp jibermek bolyp umtylǵan. Al ol úshin jańa álemniń tynys-tirshiligin jadyna toqý mindet. 2010 jyly «Mektep jasyna deıingi balalar psıhologııasy» kýrsyn támamdady. Janǵa jaıly samal leppen jaıqalǵan jaýqazynnyń boıyna dert qalaı qumar, daýasy qaıda, emi ne bolmaq? Kózjanar otynyń kemýi deısiz be, til múkistigi deısiz be, osy jerge úımelepti. Sábıge aǵzany arashalap sylyp tastamaq bolǵan. Sol maqsat jetektep Oral memlekettik ýnıversıtetine ákeldi. «Tilinde múkisi balalarmen jumys júrgizýdiń logo-pedagogıkasy men psıhologııasy» baǵyty boıynsha.

Qarjyger Nazgúl Tólepbergenqyzy balalar álemine kóńili qulaǵany sonsha­lyq, ózge dúnıeni umytty dese de bolady. Osy bir sıqyrly sát ishki ıirim­de­rine eliktirip, jetektedi de otyrdy. Naq­tyraq aıtqanda, balalarǵa degen mahabbattyń alapat kúshi shyǵar. Sońǵy segiz jyl ǵumyryn aýyldaǵy balalar baqshasynda tálim-tárbıe alyp jatqan baldyrǵandarǵa arnady. Bylaıǵyǵa aıqyn kórinbegenimen, bul jerde másele tunyp tur. Tili kesh nemese kem shyǵatyn keleńsiz kórinis jyldan-jylǵa órship keledi. Alańdatarlyq jaı. Onyń ar jaǵynda ár balanyń taǵdyry qylań beredi. Balalar baqshasyndaǵy jópsheńdi adamnyń tózimi jete bermeıtin qııapat qareketpen alysa júrip, saldardyń sebebin izdeýge jan-tánimen tyrysty. Bul shyn máninde alapat jumys edi. Áýel basta, jas ǵalymnyń bolashaǵynan, múmkindiginen habardar bolǵan keıbir zamandastary túsinbestik tanytqan. Aldyńnan jarqyn jol ashylyp, ǵylymǵa barar bıik qolsozym jerde ǵana turǵanda, balalar baqshasynyń beınetine batyp neń bar edi degendeı emeýirin tanytqan. Al bul bolsa perishte álemniń pendeshiligin kórip, ımany qasym bolǵan. Qıyndyq kóp bolǵanymen, kúresýge qajyry jetetin edi. О́ıtkeni tula boıda tabıǵat syılaǵan talant bar. Talantty adam kez kelgen jerde de qursaýdy buzyp shyqpas pa. Álgi zamandastary Nazgúl Tólepbergenqyzynyń boıyndaǵy qarapaıymdylyqqa qaıran qalatyn. Jas ǵalym eshqashan qoly jetken tabysymen kózge uryp maqtanǵan emes. Maqtaý sóz bógde adamnyń aýzymen aıtylady. Muny da tal boıyndaǵy tamasha qasıettiń biri dep qoıyńyz.

Eńbek qashanda elenbek. Bilim jáne ǵylym mınıs­tr­liginiń Qurmet gramotasymen marapat­taldy. Bul tabany tastan taımaǵan tar­lanbozdaı nátıjeli eńbeginiń jemisi. Al halyqtyń alǵysy tipten kere­met. Jetkinshekteri balabaqshada tárbıe­le­netin ata-analar «úlken júrekti ana» dep baǵa bergen. Sol úlken júrek jaryq dúnıe esigin ashqannan aqaýly ekenin bireý bilip, bireý bilmes. Den­saýlyǵyndaǵy azdaǵan kináratqa qaramastan ár balamen jeke jumys istep, árqaısysynyń densaýlyǵyn oılap, eńbegin el erteńine sińirip, bolashaqtyń baǵbany atanyp otyr. Mektepke deıingi mekemeler assosıasııasynyń múshesi retinde balalar baqshalarynyń múddelerin qorǵaý basty mindeti ispetti.

Kún astynda júrgenimen, kúrsinýge sebep kóp. Jetim bala et júregin syz­da­tady. Olardyń da gúldeı jaınap ósýge ábden haqysy bar. Nazgúl Tólep­ber­gen­qyzy bar múmkindigin osy baǵytqa da jum­saıdy.

– О́zimdi baqytty adammyn dep sanaımyn, – deıdi Nazgúl Tólepbergenqyzy, – bala tárbıesi úshin basty keregi – jan jylýy, shydam men qajyr-qaırat jáne tózim. Bir balanyń anasy bolý baqyt bolyp eseptelse, kóp balanyń anasy bolý sol baqyttyń eselengen túri.

Adal eńbeginiń arqasynda rııasyz, ádemi kúlki shúpildegen bolashaq baspaldaǵynda keler kúnniń keregesin keńeıtýge qısapsyz eńbek sińirip jatqan ananyń, ustazdyń ustanymy osy.

Egemendi elimiz máńgilik murattary jolyndaǵy bolashaqqa bettep barady. Bolashaǵy baıandy bolýy úshin eskermegenge eleýsiz bolyp kóriner ulan-ǵaıyr jumys atqaryp jatqan bizdiń keıip­kerimiz ispetti tálimgerlerdiń tirshi­li­gi maqtaýly sózge qashanda laıyq. Solar­dyń ortasynda, aldyńǵy leginde «Qazaq­stannyń 100 jańa esimi» arnaıy jobasynyń jeńimpazy Nazgúl Jákeno­vanyń júrgeni jarasymdy. Olaı bolatyny, Nazgúl óziniń jan júre­gi­niń shapaǵatymen balalar álemin nurly álemge aınaldyrýda.

Aqmola oblysy,

Selınograd aýdany