Volonterler shtaby qurylyp, aımaq turǵyndarynyń qajettilikterin eskerip, qolushyn sozyp júrgenderdiń, qoǵamdyq tártipti retteýge atsalysqandardyń qatarynda atyraýlyq volonterler shtaby da bar. Bir qyzyǵy, shtab músheleri qataryn tolyqtyrýǵa nıettiler kún sanap artyp keledi. Kómekke kelgenderdiń orta jasy 30-da. Iаǵnı olar – qalanyń eresek, aqyl toqtatqan azamattary.
Atyraý oblysy Ishki saıasat basqarmasy Azamattyq ortalyq KMM-niń janynan qurylǵan Volonterler shtaby birneshe baǵyt boıynsha qyzmet atqarady.
Kez kelgen atyraýlyq eriktilerdiń qataryna qosylyp, tómende kórsetilgen alty baǵyt boıynsha jumys isteı alady: avto-volonterler (turǵyndarǵa azyq-túlik, dári-dármek taratýǵa kómek); medısına volonterleri (jedel-járdem qyzmetkerlerine kómek); monıtorıng júrgizetin volonterler (azyq-túlik baǵalaryna monıtorıng jasaýǵa kómek); reıdke shyǵatyn volonterler (polısııa qyzmetkerlerine kómek); volonter tiginshiler (birneshe márte paıdalanýǵa bolatyn maskalardy tigýge kómek); kýlınar-volonterler (bekettegi qyzmetkerlerge jáne medbıkeler men dárigerlerge ystyq bólkeler jetkizýge kómek).
Volonterler shtaby estafeta bastap, on kúnge jýyq ýaqytta 2 mln teńgeden astam qarajat jınady. Estafetaǵa respýblıkamyzdyń barlyq aımaqtarynan atsalysty. Jınalǵan qarjyǵa egde tartqan qarttarǵa, múmkindigi shekteýli jandarǵa, kóp balaly jáne jalǵyzbasty analarǵa, jalpy 207 otbasyǵa azyq-túlik sebetin taratty. Azyq-túliktiń bir sebeti 13 600 teńgeden 14 800 teńgege deıingi shamada alynǵan. Atyraýlyq kásipkerler Baýyrjan Kenjeǵalıev pen Gýseın Ibragımov taǵy 100 otbasyǵa azyq-túlikpen kómektesti. 77 otbasy kompanııalar tarapynan járdem aldy. «Tehnoservıs» JShS 50 otbasyna antıseptık taratty.
Volonter tiginshiler birneshe márte paıdalanýǵa arnalǵan 12 269 maska tikti. Budan bólek katolık shirkeýiniń volonterleri 132 maska tigip berdi.
Monıtorıng júrgizetin volonterler aýdandarǵa bólinip, azyq-túlik baǵasyna monıtorıng júrgize bastady. Árqaısysy dúkenderdi, sýpermarketterdi aptasyna úsh ret aralap shyǵady. Baǵalar kestesin qalalyq kásipkerler bólimine jiberip otyrady.
Volonterler shtabynda 100-ge jýyq volonter bar. Olar bes baǵyt boıynsha kómektesedi. Volonterler – 30-55 aralyǵyndaǵy qala turǵyndary. Olardyń arasynda taksıshiler, kompanııa qyzmetkerleri, úı sharýasyndaǵy adamdar, vahtada jumys istegen azamattar da bar.
Elvıra ARALOVA,
«Samǵa júregim» qoǵamdyq birlestiginiń jetekshisi:
– Biz aptasyna 3 ret sýpermarketter, bazarlardaǵy baǵany baqylaımyz. Shaǵymdanýǵa esh sebep joq. Baǵa aıyrmashylyǵyn baıqamadyq.
Budan bólek reıdke shyǵyp, vokzal mańyndaǵy aýdandardy tekserdik. Maska taqpaǵan, medısınalyq qolǵap kımegen adamdardy kezdestirdik. Barlyǵyna eskertý jasaldy. Adamdar áli de saqtyq sharalaryna salǵyrt qaraıdy. Osy oraıda asa qajettilik bolmasa, turǵyndardyń úıde otyrǵany abzal ekenin taǵy bir eskertkimiz keledi. Al dalaǵa shyqqan jaǵdaıda maska jáne medısınalyq qolǵap kııýi kerektigin umytpasa deımiz. Sol kezde ǵana biz qaýiptiń, indettiń aldyn alamyz.
Áıgerim DOSQALIEVA,
Azamattyq ortalyqtyń dırektory:
– On kúnge jýyq ýaqytta bizdiń qordaǵy qarajat 2 mln teńgeden asty. Jınalǵan qarajatqa 384 muqtaj otbasyǵa azyq-túlik satyp alyndy. Jergilikti qaıyrymdy jandarǵa da alǵysymyzdy bildiremiz. Alla razy bolsyn!
Volonterler 5 baǵyt boıynsha jumys istep jatyr. Jaqynda altynshy baǵytty qostyq. Olar – kýlınar-volonterler. Iаǵnı olar bekette turǵan qyzmetkerler men dárigerlerge ystyq bólke pisirip jetkizedi. Aldaǵy ýaqytta ystyq taǵammen qamtamasyz etý de oıymyzda bar. Volonterlerdiń barlyǵy da 30-55 jas aralyǵyndaǵy qala turǵyndary.
Sonymen qatar Atyraý oblysy Polısııa departamentiniń basshysy Hamza Úmbetqalıev myrzaǵa bizdiń volonterlerge arnaıy tigilgen formalar bergeni úshin alǵys bildirgim keledi.
Almagúl ǴALYMJANOVA,
qala turǵyny:
– Az qamtylǵan, jalǵyzbasty, kóp balaly analarǵa, qarttarǵa qolushyn sozǵandary úshin Atyraý qalasynyń volonterlerine kóp rahmet! Bir-birimizge osylaı qoldaý kórsetý arqyly birligi jarasqan el ekenimizdi kórsete aldyq dep oılaımyn. Nıetterińiz Alladan qaıtsyn!
Gúlnaz QOSMÝRZIEVA,
volonter
Atyraý