Almaty qalasynyń ákimi jumys sapary barysynda qoǵamdyq keńistikti abattandyrý jáne kógaldandyrý jónindegi jobalarmen tanysty. Arý qalany abattandyrýǵa arnalǵan kezekti sharalar legi «Jumyspen qamtýdyń jol kartasy» baǵdarlamasy aıasynda júzege aspaq.
Qala ákimi buǵan deıin óziniń Instagram paraqshasyna qoǵamdyq keńistikti abattandyrý jáne kógaldandyrý boıynsha jobalardy iske asyrý kezinde «Jańa Almaty» shaǵynaýdany basty nazarda bolatynyn málimdegen edi.
«Bir ǵana Alataý aýdanynda birden 20 joba josparlanǵan. Onyń ishinde «Qarasý» shaǵynaýdanynda rekreasııalyq aımaq qurylysy, «Shapaǵat» jáne «Zerdeli» shaǵynaýdandaryndaǵy skverlerdi jóndeý jumystary bar. Mundaı jumystar basqa aýdandarda da júrgiziletin bolady», - dep jazdy B. Saǵyntaev.
Shahar basshysynyń aıtýynsha, qala turǵyndarynyń ómirine qolaıly jaǵdaı týǵyzý úshin jaıaý júrginshiler aımaǵyn jáne kóppáterli turǵyn úılerge irgeles aýmaqtardy abattandyrý, balalar alańdary men aýladaǵy sport alańdaryn salý, aryq júıesi men jaryqtandyrýdy jóndeý jumystary qarastyrylǵan.
«Oryndyqtar, jaryq kózderi sekildi bezendirý elementteri yńǵaıly ári qala turǵyndaryna uzaq ýaqyt qyzmet etýi úshin joǵary sapaly materıaldardy paıdalanýdy qamtamasyz etý kerek. Sondaı-aq bul jabdyqtar qazirgi jáne jańadan qurylǵan qalalyq keńistikterdiń sáýlettik kelbetine sáıkes bolýy tıis», – dep atap ótti B. Saǵyntaev.
«Eldi-mekenderdi abattandyrý» baǵyty boıynsha 12,5 myń jumys ornyn qamtıtyn 125 joba iske asyrylatyn bolady. Jalpy, aǵymdaǵy jyly JQJK aıasynda 214 joba boıynsha 26 myń adam jumysqa ornalasady.