О́ner ultqa bólinbeıdi. Sonyń aıqyn dáleli kókshetaýlyq jas kúıshi – Iýrıı Kochetygov. Ol 10 jasynan qazaqtyń qos ishekti dombyrasyn janyna serik etken. О́nerli óren memlekettik tilde de múdirmeı sóıleıdi. Kóptegen halyqaralyq, respýblıkalyq baıqaýlarda top jaryp júr.
Bul kúı atasy Quramanǵazynyń «Adaıy» dombyra shanaǵynan tógilip tur. Iýrıı kádimgi dáýlesker dombyrashylarsha qapysyz sheberlikpen oryndaıdy eken. Osyndaı rýhty kúıler Iýrııdiń repertýarynda kóptep kezdesedi. О́nerge qatty qyzyqqan ónerpazdy 10 jasynda ata-anasy mýzykalyq mektepke ákeledi. Sol kezde túrli aspaptardyń ishinen orys balasy qazaqtyń dombyrasyn tańdaıdy. Onyń sózinshe, qos ishekti dombyranyń kúmbiri erekshe.
– Meni eń alǵash mýzykalyq mektepke ákelgende ol jerde aspaptar kóp boldy. Pıanıno, fortopıano, baıan sekildi. Biraq men dombyrany tańdadym. Sebebi dombyranyń daýysy, úni maǵan qatty unady. Al, osy dombyrany maǵan ata-anam arnaıy jasatty. Men qazirgi tańda 50-den astam kúı bilemin. Búginde Birjan sal kolledjinde «Dombyra pániniń muǵalimi» mamandyǵynda oqyp jatyrmyn. Bolashaqta basqa balalarǵa dombyra úıretemin. Maǵan Qurmanǵazy atamyzdyń jáne Seken Turysbekovtyń kúıleri unaıdy. Ásirese Seken Turysbekovtiń «Aq jaýyn» kúıi, – deıdi jas dombyrashy Iýrıı Kochetygov.
Iýrıı otbasynyń tuńǵyshy. Artynan ergen qaryndasy Zlata da qazaq mektebinde oqıdy. Ol da ónerden qur alaqan emes. Aǵasy sııaqty dombyra, fleıta aspaptarynda oınaıdy. Al, ata-analary árdaıym olardyń ónerine qoldaý bildirip, shyǵarmashylyqtaryn shyńdaýǵa úles qosyp keledi.
– Biz Iýrııdi memlekettik tilde oqytqan sebebimiz,ol qazaq balabaqshasyna bardy. Kóp sózder úırenip, túsine bastady. Qazaqsha taza sóılegen soń, biz ony Málik Ǵabdýllın atyndaǵy mektep-gımnazııasyna qazaq tilinde bilim alýǵa berdik. Meniń oıymsha, ár bala memlekettik tildi bilýi kerek. 10 jasynda ol mýzykamen aınalysqysy keldi. Mýzykalyq mektepke alyp kelsem, dombyra kýrsyna irikteý bolyp jatyr eken. Iýrııdiń qyzyǵýshylyǵyn baıqadym da sol dombyra kýrsyna jazdym. Bul onyń qalaýy, – deıdi anasy Olesıa Kochetygova.
Qos ishektiń qulaǵyn burap, kúı kúmbirletken jas óren kóptegen baıqaýlarda top jarǵan. Atap aıtsaq, halyqaralyq «Astana - mereı», «Anaǵa taǵzym» baıqaýlarynda dıplomant atanǵan. Oblystyq saıystardyń birneshe dúrkin laýreaty. Iýrıı osyndaı shyǵarmashylyq baıqaýlardyń birde-bireýin qalt jibermeýge tyrysady. Ol bolashaqta qazaqtyń kıeli dombyrasymen álemdik arenada óner kórsetsem degen izgi armanyn jasyrmady.