Bizdiń mindetimiz – sapaly bilim berý jáne joǵary biliktilikke ıe básekege qabiletti mamandar daıarlaý. QazUÝ-da qurylǵan zamanaýı IT-ınfraqurylym jáne ýnıversıtettiń jasap shyǵarǵan «Univer» júıesi jedel túrde, eshqandaı qıyndyqsyz, sabaq kestesin ózgertpeı-aq qashyqtan oqýǵa kóshýge múmkindik týǵyzdy. Oqý úderisi «Microsoft teams», «Zoom», «Google meet» taǵy basqa sııaqty platformalar arqyly júzege asyrylýda. QazUÝ-da jasalǵan moocs.kz. sıfrly bilim berý resýrsy erekshe suranysqa ıe.
Osy tusta eskere ketetin jaıt, ýnıversıtettiń baspasóz qyzmetiniń derekterine súıensek, áleýmettik jelilerdegi ál-Farabı atyndaǵy QazUÝ-ǵa eshqandaı qatysy joq «KazNU» degen qysqartylǵan ataýmen tirkelgen akkaýntta aldaǵy qashyqtan ótkizý formaty boıynsha josparlanǵan emtıhan sessııasyn boldyrmaýdy talap etken úndeý paıda boldy. Osy máselege oraı ýnıversıtet QazUÝ-dyń ataýyn zańsyz paıdalanǵan tulǵalarǵa shara qoldaný jóninde quqyq qorǵaý organdaryna ótinish jasady.
Tótenshe jaǵdaı kezinde Bilim jáne ǵylym mınıstrligi beretin resmı, onyń ishinde emtıhandy qashyqtan ótkizý tártibi týraly aqparatty ǵana qoldaný qajettigine nazar aýdaramyz. Bilim berý úderisine baılanysty barlyq máseleler syndarly túrde jáne JOO-lardyń akademııalyq saıasaty aıasynda sheshilýi tıis. Memlekettik jalpy mindetti bilim berý standartynyń talaptaryna sáıkes kelesi kýrsqa ótý, sondaı-aq dıplom alý úshin qorytyndy attestasııadan ótý kerek, ıaǵnı emtıhandy tapsyrý jáne dıplom (dıssertasııa) jumysyn qorǵaý qajet. Muny ýaqytynda iske asyrý úshin karantın jaǵdaıynda aǵymdaǵy emtıhan sessııasy qashyqtan ótkiziledi. Stýdentter emtıhandy jazbasha, aýyzsha, test nemese joba túrinde tapsyra alady. Sessııanyń merzimi jáne emtıhandardy tapsyrý ýaqyty eleýli túrde uzartylǵan, bul barynsha tolyqqandy daıyndalýǵa múmkindik beredi. Sondaı-aq jaqsy oqý úlgerimi úshin stýdentterge qosymsha ball qoıý jaǵy da qarastyrylǵan. Sonymen birge, keıbir beıindi emes jeke pánderden aralyq baqylaýlardyń arıfmetıkalyq ortaq balyn qoıý múmkindigi de qarastyrylǵan. QazUÝ qabyldaǵan sharalar kesheni stýdentterge keıinge qaldyrmaı barlyq emtıhandy ýaqytynda tapsyrýǵa, kelesi kýrsqa tabysty ótýge, dıplom alyp, jumysqa ornalasýǵa, magıstratýra men doktorantýrada oqýlaryn jalǵastyrýǵa múmkindik beredi.
Sonymen qatar, keıbir stýdentterde qashyqtan oqytý tehnologııalaryna qoljetkizý qıyndyqtary týyndaýda ekendigin túsine otyryp, olardyń bergen ótinishi boıynsha emtıhan keıinge qaldyrylady. Karantın rejımi toqtatylǵannan keıin olar ýnıversıtetke kelip, emtıhandy aýdıtorııada tapsyra alady.
QazUÝ stýdentteri emtıhan sessııasyn ótkizý týraly tolyq aqparatty aǵymdaǵy jyldyń 24 sáýirinde saǵat 15.00-de ýnıversıtettiń Instagram-daǵy resmı akkaýntynda (https://www.instagram.com/KAZNU_FARABI/) oqý isi jónindegi prorektordyń onlaın-túsindirýi barysynda ala alady.
Ýnıversıtet basshylyǵy karantınniń kúrdeli kezeńinde búkil el qashyqtyqtan jumys isteýge kóshken kezde, qazirgi zamanaýı tehnologııalardy paıdalanýdyń jańa oń tájirıbesin paıdalanyp, jaǵdaıǵa sanaly túrde qarap, jaýapkershilik tanytý qajettigin aıtady. Olardy belsendi qoldaný bolashaqta bilim berýdiń sapaly joǵary deńgeıine shyǵýǵa múmkindik beredi.