Mańǵystaý oblysy Polısııa departamentiniń qyzmetkerleri Aqtaýda koronavırýs juqtyrǵan adamnyń jezókshelermen baılanysyn jasyrǵany anyqtaldy. Bul týraly Sybaılas jemqorlyqqa qarsy is-qımyl agenttigi Mańǵystaý oblysy boıynsha departamenti habarlady.
«Mańǵystaý oblysy boıynsha departament oblystyq prokýratýramen birlese Polısııa departamenti laýazymdy tulǵalarynyń zańsyz áreketiniń jolyn kesti. Olar jezókshelikpen aınalysý úshin Aqtaý qalasy aýmaǵynda prıton jelisin uıymdastyrýda shetel azamattaryna qamqorlyq jasap keldi degen kúdikke ilindi, dedi QR Sybaılas jemqorlyqqa qarsy is-qımyl agenttigi Apparat basshysy Q. Japaqov onlaın brıfıngide.
Polısııa qyzmetkerleri karantın rejımine qaramastan, prıtondardyń quqyqqa qaıshy qyzmetiniń jolyn kesýge negizdelgen sharalardy qabyldamaǵan, sondaı-aq koronavırýs ınfeksııasyn juqtyrǵan adamnyń jezókshelikpen aınalysqandarmen tikeleı baılanysy bar ekendigin jasyrǵan.
Qazirgi tańda Sybaılas jemqorlyqqa qarsy kúres qyzmeti paraqorlyq, laýazymdyq ókilettikti teris paıdalaný, jezókshelik prıtondaryn uıymdastyrý, sondaı-aq adamdar ómiri men densaýlyǵyna qaýip týdyratyn jaǵdaılar týraly aqparatty jasyrý faktileri boıynsha tergeý amaldaryn júrgizýde.
Qabyldanǵan sharalar nátıjesinde 87 adam oqshaýlandy jáne tekserý barysynda eki sheteldikten koronavırýs ınfeksııasy anyqtaldy. Oqshaýlanǵandar arasynda prıtondarda jezókshelikpen aınalysqandar da bar.