Asa qamqor erekshe meıirimdi Allanyń atymen bastaımyn! Barlyq maqtaý Allaǵa tán. Ardaqty Paıǵambarymyz Muhammedke Allanyń salaýaty men sálemi bolsyn!
Qurmetti otandastar!
Barshamyzdy qasıetti Ramazan aıyna aman-esen jetkizgen Allaǵa sansyz shúkirler bolsyn! Sizderdi ısi musylmannyń ulyq aıy – Ramazannyń kelýimen shyn júrekten quttyqtaımyn! Ár otbasyna baqyt pen bereke, birlik pen tatýlyq tileımin!
Alla taǵala ustaǵan orazamyzdy, jasaǵan duǵamyzdy, oryndy sebeptermen aýyz bekite almaı qalǵan jandardyń qaıyrly amaldaryn qabyl etkeı! Ámın!
О́zderińizge belgili, elimizde jarııalanǵan tótenshe jaǵdaıǵa baılanysty meshitte jamaǵatpen oqylatyn namazdarǵa ýaqytsha shekteý qoıdyq. Ár azamattyń ómiri men densaýlyǵy qymbat qundylyq bolǵandyqtan, juqpaly indettiń aldyn alý úshin osyndaı sheshim qabyldaýǵa májbúr boldyq.
Alaıda ýaqytsha synaq kezinde jamaǵat namazy úshin meshit esigi jabylǵanymen, saýap esigi eshqashan jabylmaıdy. Qasıetti hadıs-sharıfte aıtylǵandaı, musylmannyń nıeti – amalynan qaıyrly. Ǵalamtor jelisi arqyly onlaın nasıhat tyńdap, úıden shyqpaı saýapty amaldarǵa ortaqtasýǵa bolady. Biz tótenshe jaǵdaı kezinde pitir sadaqasy men zeketti onlaın rejimde berýdiń ońtaıly jolyn tańdadyq.
Qadirli halaıyq! Ramazan – jaqsylyqta jarysatyn aı. Alla taǵala qasıetti Quranda «Baqara» súresiniń 148-aıatynda: «...Jaqsylyqta jarysyńdar», dep ámir etken.
Karantın kezinde aýyz bekitken jandarǵa azyq-túlik jetkizip berýdi uıymdastyrsańyz, tipti kómekke muqtaj otbasylarǵa aýyzasharǵa ketetin shyǵyndy usynyp, olarǵa qarjylaı qoldaý kórsetseńiz, Allanyń qalaýymen aýyzashar bergenniń saýabyn alasyz. Joǵaryda aıtqanymyzdaı, musylmannyń nıeti – amalynan qaıyrly. Osy rette barsha otandastarymdy qasıetti aıdyń qurmeti úshin aqysyz demalysqa shyqqan azamattardyń páter aqysyna múmkindiginshe jeńildik jasaýǵa, kúndelikti tutynatyn turmystyq zattar men azyq-túlik baǵasyn barynsha tómendetýge, kúlli jamandyqtyń bastaýy bolǵan araq-sharaptyń satylýyna shekteý qoıýǵa, kómekke muqtaj otbasylarǵa jan-jaqty qoldaý kórsetýge shaqyramyn.
Sadaqa – pendeniń mal-dáýletin azaıtpaıdy, kerisinshe berekesin arttyrady. Biz bergen sadaqa bir otbasyn qýanyshqa bóleıdi. Endeshe kómekke zárý shańyraqty shattyqqa bólep, úlkenniń batasyn alyp, alǵysyna bóleneıik.
Ardaqty Paıǵambarymyz Muhammed (oǵan Allanyń salaýaty men sálemi bolsyn): «Kimde kim baýyrynyń qajetin ótese, Alla onyń qajetinde bolady. Kimde kim musylmannyń bir qaıǵysyn seıiltse, Alla onyń qaıǵy-qasiretteriniń birin seıiltedi», degen. Halyq danalyǵynda aıtylatyn: «Qaıyrymdylyq jasasań – qaıyryn óziń kóresiń», degen naqyl sózdiń máni osy bolsa kerek.
Qurmetti jamaǵat! Ramazan – táýbe men tárbıe, taqýalyq pen qanaǵat, shúkir men sabyr, meıirim men qaıyrymdylyq, bereke men birlik aıy. Oraza – saýap jınap, rýhanı kemeldený aıy. Túıindep aıtqanda, Ramazan – Rabbymyzdyń meıirim-mahabbatyna bólenetin aı. Alla Taǵala Qudsı-hadıste: «Aýzy berik adam iship-jeýin Men úshin doǵardy. Oraza – Men jáne qulymnyń arasyndaǵy ǵıbadat. Oǵan beriletin syıdy Men ǵana ólshep, Men beremin. Aýzy berik qulymnyń ashtyq pen shóldeý sebebinen shyqqan aýyz ıisi Men úshin mısk átirinen de qaıyrly», degen. Endeshe berekeli aıdyń bereketinen qur qalmaıyq, halaıyq. Jánnat esikteri ashylatyn aıda jaqsylyqta jarysaıyq. Alla taǵala nıetimiz ben amalymyzdy qabyl etip, barshamyzdy Ramazannan Ramazanǵa deıin aıdan aman, jyldan esen jetkize bergeı!
Jer betinde juqpaly indet joıylyp, oraza aıtty meshitte qarsy alyp, qýanyshty sátte qaýyshýdy jazǵaı! Jaratýshy Iemiz jurtymyzǵa jar bolǵaı, elimizdi aman, jerimizdi tynysh etkeı! Ámın!
Ramazan aıy qutty bolsyn!
Naýryzbaı qajy TAǴANULY,
Qazaqstan musylmandary dinı basqarmasynyń tóraǵasy, Bas múftı