Aqmolalyq taýar óndirýshiler karantın jaǵdaıynda da ónim óndirý kórsetkishin tómendetpeı, oblys turǵyndarynyń qajetin tolyq óteýde.
Jergilikti kásipkerler kún saıyn 300 tonna sút ónimin, 77 tonna iri qara mal etin, 123 tonna qus etin, 2,2 mıllıon dana jumyrtqa, 1000 tonna un jáne ózge de taýarlar óndiredi. О́zge oblystardan shamamen 100 tonna kartop, sábiz ben pııaz tárizdi kókónis ónimderi tasymaldanady.
Áleýmettik mańyzy bar azyq-túlik taýarlaryna suranystyń ósýi aıasynda memlekettik organdardyń aldyna taǵamdar baǵasynyń kóterilýine jol bermeý jóninde mindetter qoıyldy. Bul baǵytta oblysta tıisti jumystar júrgizilýde. Qoldanǵan sharalardyń nátıjesinde keıbir azyq-túlik taǵamdarynyń baǵasy tótenshe jaǵdaıǵa deıingi baǵamen salystyrǵanda tómendedi. Oblys ortalyǵynda ornalasqan «Kókshe nan» jáne «Kókshetaý nan zaýyty» seriktestikterimen kelisimge qol jetkizilip, nan baǵasy 16 paıyzǵa arzandady. «Aqsaı nan-Kókshetaý» seriktestiginiń fırmalyq saýda oryndarynda nan 75 teńgeden satylýda. Birjan sal aýdanynda ornalasqan «QazGerQus» seriktestiginen jumyrtqa tikeleı tasymaldanyp, on jumyrtqa 267 teńgeden satylýda. Sondaı-aq, ózge taýarlardyń baǵasyn tómendetý máselesi qarastyrylýda.
О́ńirdegi kóterme saýda oryndarynyń qoımalaryndaǵy azyq-túlik taǵamdarynyń qoryna jáne ózge oblystardan tasymaldanatyn taýarlarǵakún saıyn monıtorıng júrgiziledi. Búgingi kúni bul qordaǵy azyq-túlik 35 myń tonnany quraıdy. Taýarlar úzilissiz satylýda. Oblysta ónim tapshylyǵy baıqalmaıdy. Sondaı-aq, «Esil» áleýmettik kásipkerlik korporasııasynyń óńirlik turaqty qoryn kóbeıtý boıynsha aýqymdy jumys júrgizilýde. Búgingi kúni munda 1,8 myń tonna áleýmettik mańyzy bar azyq-túlik taýarlary bar. Qosymsha taǵy 1 myń tonna taýar satyp alý josparlanyp otyr.