Omby qalasyndaǵy Qazaqstan Respýblıkasynyń elshiligine jáne «Omby qazaqtary» qoǵamdyq uıymyna sońǵy aptalarda Reseıden Qazaqstanǵa oralýǵa kómek suraǵan bir de ótinim túspegen. Túrli sebeptermen shette júrgen otandastarymyz ýaqytyly elge oralypty.
«Biz birgemiz» aksııasy qazaqstandyqtardy ǵana emes, shet el qazaqtaryn da judyryqtaı jumyldyrdy. Tótenshe jaǵdaı jarııalanǵaly Novosibir, Túmen jáne Omby oblystaryndaǵy qazaq qaýymdastyqtarynyń belsendileri qazaqstandyqtardy elge qaıtarýǵa járdemdese bastady. Koronavırýs pandemııasynyń taralýyna baılanysty shekaralar jabylyp, áýe jáne temirjol, tipti avtobýs qatynasy da toqtady. Otandastarymyz shekaradan ótýge qatysty qıyndyqtarǵa tap boldy. Qazaq qoǵamdastyǵynyń belsendileri der kezinde kómekke keldi.
–Tranzıttik baılanys uıymdastyryldy. Iаǵnı, avtokólikter Reseı elinen shekaraǵa deıin jetkizip, ári qaraı shekarany jaıaý júrip ótti. Odan soń bizdiń áriptester olardy qarsy aldy. Osylaısha 12 adam tasymaldandy. Onyń 4-i bizdiń seriktesterimizdiń qarjylandyrýymen elge jetkizildi. Mysaly, Tomsk jáne Hanty-Mansıısk qalalaryndaǵy jerlesterimiz Qazaqstanǵa jetý úshin Ombyǵa deıin baryp, sol jerde turaqtaýy kerek boldy. Biz Reseıde jáne Qazaqstanda olarǵa kómek kórsetetin erikti toptar qurdyq. Qazaqstan elshiligi de kómekke kóp adamdardy jiberdi,–deıdi «Omby qazaqtary» qoǵamdyq uıymynyń tóraǵasy Qýanysh Eleýtaev.
Qazirgi ýaqytta Ombyda 100 myń qazaq turady. Bul jalpy halyq sanynyń 4 prosenti. «Omby qazaqtary» qoǵamdyq uıymy belsendilerdiń qatarynda. 12 jyldan beri uıym qazaq mádenıetin nasıhattap keledi. Biraz jobalar iske asty. Bıylǵy jyldan bastap naýryz meıramy qalalyq josparǵa endi, demek oǵan qala ákimdiginen qarajat bólinetin bolady.
–Bizdiń Qazaqstanmen áriptestigimiz ejelden ajyraǵan joq, jalǵasa beredi. Qazaqstandyq «Otandastar» qoryndaǵy áriptesterimizben birge atqaratyn kóptegen jobalarymyz bar. Mysaly, qazaq tilin úıretetin onlaın kýrstar ashý isi. Reseı balalary aptasyna úsh ret Nur-Sultan qalasyndaǵy stýdııanyń tikeleı efırine qosylyp til úırenýde,–deıdi «Omby qazaqtary» qoǵamdyq uıymynyń múshesi Saltanat Kenshinbaeva.
Omby qalasynda tamyz aıynda jyl saıyn uıymdastyrylatyn dástúrli «Eýrazııa baılyǵy» kórmesi ótedi. Qazaqstandyq taýar óndirýshiler óz ónimderin usynady. Aıta keteıik, Aqmola, Soltústik Qazaqstan jáne Pavlodar oblystarynyń taýarlary ombylyqtar arasynda úlken suranysqa ıe. Qala ákimdigi úsh kún boıy qazaqstandyqtarǵa qoımalar men satylym kórmege arnalǵan alańqaılardy tegin usynatyn bolady. Abaı Qunanbaıulynyń 175 jyldyǵyna oraı da birqatar shara uıymdastyrylady. Árıne, álemde oryn alyp otyrǵan ýaqytsha qıyndyq tezirek aıaqtalsa, – deıdi qoǵamdyq uıymnyń ókilderi.
Aqmola oblysy.