Bıyl qazaq dalasyna Uly Jeńistiń kelgenine 75 jyl. Erlerdiń qany men jany arqyly kelgen beıbitshilik – búgingi kúnniń basty baılyǵy. Ardagerlerdiń erligi eshqashan umytylmaıdy.
Áýlıeata óńirinde de Uly Jeńis merekesi ózindik sán-saltanatymen atalyp ótiledi. Jambyl oblystyq ákimdiginiń málimetinshe, óńirde Uly Jeńistiń 75 jyldyǵyn merekeleýge arnalǵan is-sharalar jospary bekitildi. Barlyq merekelik is-sharalar onlaın-formatta ótedi. Sonymen qatar, qyrkúıek aıynda mektepterde patrıottyq jáne erlik sabaqtaryn ótkizý josparlanýda.
Búgingi tańda Jambyl oblysynda Uly Otan soǵysynyń 57 ardageri men múgedegi turady. Olardyń árqaısysyna Uly Jeńis kúnine oraı 1 mıllıon teńgeden áleýmettik kómek kórsetiledi. Sonymen qatar, Uly Otan soǵysynyń qatysýshylary men múgedekterine teńestirilgen 1989 adam 100 myń teńgeden alady. Tyl eńbekkerleri de nazardan tys qalmaǵan. Soǵys jyldarynda tylda 6 aıdan astam jumys istegen 4742 adamǵa 50 myń teńgeden beriledi. Uly Otan soǵysyna qatysýshylardyń 337 jesiri men soǵys múgedekteriniń áıelderi de áleýmettik kómekke ıe bolady. Lenıngrad qorshaýynyń úsh burynǵy tutqynyna jáne konslagerdiń úsh tutqynyna 60 myń teńgeden tólenedi. Sondaı-aq, Uly Otan soǵysynyń ardagerleri men tyl eńbekkerlerine Memleket basshysynyń atynan medaldar, alǵys hattar men azyq-túlik sebetteri beriledi. Al, Jambyl oblysynyń aýmaǵynda 197 soǵys batyrlaryna eskertkish ornatylǵan. Onyń ishinde 11-i memorıaldyq taqta. Keńes Odaǵynyń Batyrlary men «Dańq» ordeni ıegerleriniń esimderi oblys boıynsha bir eldi mekenge, úsh aýyldyq okrýgke, 41 nysanǵa, 575 kóshege berilgen.
Jambyl oblysy