Búgin qazaqtyń kórnekti jazýshysy, Qazaqstan Memlekettik syılyǵynyń jáne M.Áýezov atyndaǵy Ulttyq syılyqtyń laýreaty, Túrkistan qalasy men birneshe aýdannyń qurmetti azamaty Dúkenbaı Dosjan ómirden ótti.
Dúkenbaı Dosjan 1942 jyly 9 qyrkúıekte Qyzylorda oblysynyń Jańaqorǵan aýdanyndaǵy Qulanshy aýylynda týǵan. Eńbek jolyn 1964 jyly QazMÝ-dy bitirgennen keıin Almaty oblystyq «Jetisý» gazetinde ádebı qyzmetker bolyp qyzmet etýden bastady. Uzaq jyldar «Jazýshy» baspasynda aǵa redaktor,Qazaqstan Baspa, polıgrafııa jáne kitap saýdasy isteri jónindegi memlekettik komıtetinde bólim meńgerýshisi qyzmetterin atqardy.Budan keıingi jyldary Qazaqstan Jazýshylar odaǵynda ádebı keńesshi, «Jalyn» jýrnalynda bólim meńgerýshisi boldy.
Dúkenbaı Dosjan qazaq ádebıetiniń tarıhynda 23 jasynda «Jýsan men gúlder» atty roman jazyp, baspadan shyǵarǵan asa talantty qalamger retinde qaldy. Sodan beri onyń qýatty qalamynan 11 roman, 22 hıkaıat, 100-diń ústinde áńgime týdy.
Qalamger 1996 jyly «Qum kitaby» úshin Qazaqstan Memlekettik syılyǵyn, 1974 jyly «Zaýal» kitaby úshin «Molodaıa gvardııa» baspasynyń «Qazirgi zamanǵy jaqsy roman» syılyǵyn, 1988 jyly Ýkraınanyń «Dnepro» baspasynan shyqqan «Jibek joly» romany úshin «Tarıhı taqyryptaǵy jaqsy kitap» syılyǵyn aldy.
Dúkenbaı Dosjan sońǵy jyldary barynsha ónikti jazyp júrgen jazýshylarymyzdy biri edi. Ol qazirgi zamanǵy álemdik proza úlgisimen qalam tarta bastaǵan da sanaýly týyndygerlerimizdiń biri boldy.
Biz arǵy-bergi qazaq ádebıetiniń kórnekti ókilderiniń biri bolyp tabylatyn belgili jazýshynyń otbasyna osy oqıǵaǵa baılanysty qaıǵyryp, kóńil aıtamyz.
«Egemen-aqparat».