Qoǵamdyq oryndardy zalalsyzdandyrý jumystaryna arnaıy jabdyqtalǵan «Hubei Dalu» tehnıkasy tartylyp otyr.
Kókpektide kósheler men kópshilik baratyn oryndar jappaı tazalanyp jatyr. Indettiń taralmaýyna jol bermeýdiń birden-bir joly – zalalsyzdandyrý. Qazirgi tańda bul is Kókpekti aýdanynda júıeli atqarylýda. Aýdan ortalyǵy men halyq kóp shoǵyrlanǵan Samar aýylynda aýqymdy jumys uıymdastyryldy.
«Zalalsyzdandyrý jumystaryna qajetti gıpohlorıt kalsıı eritindisi oblys ortalyǵy О́skemen qalasynyń «Tıtan-magnıı kombınatynan» jetkizildi. Búgingi kúni aýdanda dezınfeksııalyq eritindige qajetti 5 tonna qor bar. Árbir aýyldyq okrýgterge de qajettiligine qaraı taratylǵan. Qoǵamdyq oryndardy zalalsyzdandyrý jumystaryna arnaıy jabdyqtalǵan «Hubei Dalu» tehnıkasy tartylyp otyr. Syıymdylyǵy 4 tonna tehnıkanyń gıpohlorıt kalsıı qospasyn 5-7 metr aýmaqqa shashý múmkindigi bar» deıdi Kókpekti aýdanynyń bas sanıtarlyq dárigeri Gúlmıra Abdrasýlova. Onyń aıtýynsha, gıpohlorıt kalsıı qospasy ınfeksııalyq aýrýlarǵa qarsy bakterısıttyq qural retinde qoldanylady. Turǵyndar úshin qaýipsiz. Barlyq sharalar 2 naýryz kúni jaryq kórgen Densaýlyq Saqtaý Departamentiniń nusqaýlyǵy negizinde atqarylýda.
Bul jumys elimizde tótenshe jaǵdaı jarııalanǵan sátten bastap tolassyz júrgizilip keledi.
Shyǵys Qazaqstan oblysy,
Kókpekti aýdany