Tótenshe jaǵdaı men karantın qyspaǵynyń saldarynan nan taýyp jep otyrǵan jumysynan aıyrylyp, saly sýǵa ketken azamattarǵa memleket tarapynan kómek kórsetý – basym baǵyttaǵy mindetterdiń biri. Mysaly, 42 500 teńge áleýmettik tólemniń ózi aqylmen uqsata bilse, bir otbasyn bir aıdaı ýaqyt azyqtan taryqtyrmaýǵa áli jetetin aqsha. Sodan da bolar, búgingi kúnde atalǵan tólemniń aınalasynda órbigen ártúrli áńgime áleýmettik mańyzǵa ıe bolyp tur.
Keshe tikeleı efırde arnaıy uıymdastyrylǵan brıfıng barysynda Qaraǵandy oblysy ákiminiń orynbasary Abzal Núkenov oblys turǵyndary úshin 42 500 teńge kólemindegi áleýmettik tólemniń tóńiregindegi keıbir túsiniksiz jaıttarǵa qatysty suraqtarǵa egjeı-tegjeıli jaýap berdi.
– Tótenshe jaǵdaı kezinde tabysynan aıyrylǵan mindetti áleýmettik medısınalyq saqtandyrý júıesiniń qatysýshylaryna 42 500 teńge kóleminde tólemder taǵaıyndaý búgingi kúnde eń ózekti máselelerdiń biri bolyp otyr. Kóptegen suraqtar aldymyzdan shyǵyp jatyr. Sáýirdiń 24-ne deıingi málimetterge saı, Qaraǵandy oblysy turǵyndarynan 475 587 ótinish kelip túsken. Bul az san emes. Aıta ketetin jaıt, ótinishterdiń ishinde 202 842 qujat túrli sebepterge baılanysty qabyldanbady. Al 244 541 turǵynǵa tólem taǵaıyndaldy, – dedi Abzal Núkenov.
Jalpy, áleýmettik tólemder alty sanat boıynsha taǵaıyndalyp jatyr. Biraq, memlekettik qyzmetshiler bul tizimge enbegen. Osy rette oblys ákiminiń orynbasary kómektiń tek tótenshe jaǵdaı rejımine baılanysty jumysynan aıyrylǵan jáne tabysynan qaǵylǵan azamattarǵa ǵana kórsetiletinin atap ótti.
Brıfıngte Abzal Núkenov ótinishteri qabyldanbaǵandarǵa, ıaǵnı armandaǵan 42 500 teńge tólemge qol jetkize almaǵandarǵa qarata mynadaı málimdeme jasady.
– Keıbireýler óziniń ótinimi negizsiz qabyldanbady dep sanaıdy. Bireýlerdiń ótinishi eki jerde jumys istegendikterine baılanysty qabyldanǵan joq. Barlyq týyndaǵan máseleler boıynsha taldaý júrgizip, zerttep jatyrmyz. Kún saıyn Eńbek jáne áleýmettik qorǵaý mınıstrligimen habarlasyp, keńesip otyrmyz. Elimizdiń vıse-premeri Eraly Toǵjanov barlyq qabyldanbaǵan ótinimder boıynsha qaıta tekserý júrgizý kerektigin tapsyrdy. Iаǵnı, negizsiz taǵaıyndalmaǵan tólemder boıynsha tıisti sheshim qabyldanatyn bolady. Bul baǵytta jumystar júrgizilýde. Ár adamdy jekeleı alyp zertteıtin bolamyz, – dep sendirdi Abzal Núkenov.
Brıfıngtiń sońyna taman oblys ákiminiń orynbasary qatelikpen taǵaıyndalyp ketken áleýmettik tólemdi óz erikterimen qaıtaryp bergen sanaly azamattarǵa alǵysyn jetkizdi.
– Bul azamattyq jaýapkershilik. Adamdardyń osy qarajattyń basqa bireýlerge áldeqaıda qajet ekenin túsingen azamattyqtaryna dán rıza bolasyń, – dep atap ótti ol.
Áleýmettik tólem máseleleri boıynsha jumyspen qamtýdy úılestirý jáne áleýmettik baǵdarlamalar bólimderine telefon arqyly nemese elektrondyq poshta arqyly habarlasýdy ótingen Abzal Núkenov óziniń qabyldaý bólmesindegi telefon nomerin de kópshilikke usyndy.
Sóziniń sońynda oblys ákiminiń orynbasary jumys berýshilerge óz qyzmetkerlerin dalaǵa tastamaı, qoldan kelgenshe olarǵa demeý jasap otyrýǵa shaqyrdy.
Qaraǵandy oblysy