Qazaqstanda qyrkúıektiń 6-8-i aralyǵynda memlekettik saparmen bolǵan Qytaı Halyq Respýblıkasynyń Tóraǵasy Sı Szınpın eki el halyqtary arasyndaǵy adamgershilik qarym-qatynastyń bir úlgisi retinde aýyzǵa alyp, mysalǵa keltirgen Aspan asty elinde oqyp jatqan qazaqstandyq stýdent Rýslan Tólenovtiń (sýrette) ataǵy men dańqy bir ǵana páste kúlli álemge jaıylyp, abyroıy asqaqtap shyǵa keldi.
Qytaı lıderi bizdiń elimizde bolǵan kezinde Haınan ýnıversıtetiniń 21 jasar qazaq stýdenti týraly óte tartymdy da júrekjardy áńgime aıtyp berdi. Onyń aıtýynsha, óte sırek kezdesetin qannyń ıesi Rýslan oqý ordasynda óte jaqsy oqýmen birge, araldaǵy naýqas jandardy ajaldan arashalap qalý úshin udaıy donor bolyp otyrǵan.
Keıin anyqtaı kelgende, bul jigittiń Atyraý qalasynyń týmasy ekeni aıǵaq boldy. Rýslan osy munaıly astananyń Avangard degen jerindegi №30 orta mektepti bitiripti. Mektepten keıin Kaspıı óńiriniń qazirgi zamanǵy kolledjine oqýǵa túsken. Biraq keıin Qytaıǵa baryp oqýǵa bel býady. Bul talaby da oryndalady. Al Haınan aralyndaǵy ýnıversıtetke qabyldanǵannan keıin Aspan asty elinde «panda qany» dep atalatyn teris rezýs-faktorly óz qanyn tapsyryp donor bola bastaǵan.
«Haınan ýnıversıtetine oqýǵa túsý úshin Rýslan eki jyl qytaı tilin úırendi. Qazir ol sondaǵy «Bıznesti ákimshilendirý jáne basqarý» bóliminiń 3-kýrsynda oqıdy. Kóp ýaqyty men kúshin oqýǵa arnaıdy, - dep áńgimeleıdi Rýslannyń anasy Farıda Erjanova qazir. – Oqýdan basqa ýnıversıtette basketbol jáne voleıbol oınaıdy, sol jerdegi KVN-ge uqsas oıynǵa qatysady. Qytaı BAQ-tary Rýslan týraly QHR Tóraǵasynyń sózin jarysa taratqannan keıin, ony Haınan provınsııasynyń Mádenıet jáne bilim mınıstri óziniń qabyldaýyna shaqyrdy. Al ýnıversıtettiń rektory onyń qurmetine túski as uıymdastyrdy. Oǵan ýnıversıtette 1-kýrstan bastap oqyǵany úshin tólegen aqshalaryn qaıtaryp berildi. Dıplom alǵansha tegin oqý grantyn bólip, magıstratýra men doktorantýra kýrstaryn tegin oqýdy usynypty».
Mine, Qytaı Tóraǵasynyń aýzymen búkil álemge qas-qaǵym sátte aty tanymal bola ketken qazaqstandyq stýdenttiń qazirgi ahýaly osyndaı.
Murat Aıtqoja.