Shyǵys Qazaqstan oblysy Aıagóz aýdanynyń ákimi Dildábek Orazbaev Instagram paraqshasynda tikeleı efırge shyǵyp, kópshiliktiń suraǵyna jaýap berdi. Bul týraly aýdan ákimdiginiń baspasóz qyzmeti habarlady.
Ákimniń áleýmettik jelidegi tikeleı efıri eki saǵatqa sozyldy. 500-den astam adam saýaldaryna jaýap aldy. Aýdan basshysyna qoıylǵan suraqtyń basym bóligi koronavırýstyń taralýyna alańdaýshylyq tanytqan turǵyndardan joldandy. Dildábek Tájibaıuly óz kezeginde ár saýalǵa tolyqqandy jaýap berip, aımaqta indettiń aldyn alý jumystary ýaqytyly júrgizilip jatqandyqtan alańdaýǵa negiz joq ekenin jetkizdi. Turǵyndardy tótenshe jaǵdaıdyń tártibine jaýapkershilikpen qarap, saqtyq sharalaryna muqııat bolýǵa shaqyrdy.
Sondaı-aq, ákimge kóktemgi egis naýqanynyń kedergisiz júrýin nazarǵa alsańyz dep ótinish bildirgen fermerlerden bastap, áleýmettik sıpattaǵy sýmen qamtamasyz etý, jol jóndeý, qalany abattandyrý máselelerin kótergen azamattar da óz pikirlerin aıtty. Tehnologııanyń jańashyl múmkindigin paıdalanyp arnaıy ýaqyt bólip, azamattardyń saýaldary men ótinishterine qulaq túrgen aýdan basshysyna alǵys bildirgender de boldy.
Áleýmettik jeliniń tikeleı efırin tıimdi paıdalanǵan ákim: «Jahandy jaýlaǵan pandemııanyń aldyn alý úshin elde engizilgen tótenshe jaǵdaı saldarynan azamattardy tet-a-tet formatynda qabyldaý múmkin bolmaı tur. Sondyqtan tikeleı efır-turǵyndarǵa jınalǵan suraqtarǵa jaýap berýdiń tamasha múmkindigi. Osyndaı onlaın-kezdesýler karantındik shekteýlerdiń qoldanylý merziminiń sońyna deıin jalǵasady» dep málimdedi Dildábek Orazbaev.
Aıagóz aýdanynyń ákimi eki saǵattyq onlaın-kezdesýdi qorytyndylaı kele, barsha musylman qaýymdy Oraza aıynyń bastalýymen quttyqtap, jerlesterine beıbitshilik pen bereke tiledi.