Tarıhı Taraz shaharynyń sáýletin arttyrýǵa ári turǵyndarynyń áleýmettik jaǵdaıyn kóterýge jyl saıyn tıisti kóńil bólinip keledi. Ásirese, talaı jyldan beri páter kezeginde turǵan kópbalaly jáne az qamtylǵan otbasylar da jyl saıyn baspanaly bolýda.
Taraz qalalyq ákimdiginiń málimetinshe, aǵymdaǵy jylǵa arnalǵan jospar da aýqymdy. Málimetke súıensek, 2 jańa mektep, 3 dene shynyqtyrý-saýyqtyrý kesheni salynyp, 54 kóppáterli turǵyn úı, 88 shaqyrym jol men trotýarlar jóndeletin bolady. Balalar jáne fýtbol alańdary bar 165 aýla retke keltiriledi. Sonymen qatar, onkologııalyq aýrýhanaǵa, qala aýmaǵyna qaraıtyn «Qumshaǵal» jáne «Shalǵaı Qarasý» alqaptaryna gaz jáne sý qubyrlaryn tartý jumystary jalǵasyn tabady. Nátıjesinde tarazdyqtar úshin keminde alty myń jumys orny qurylady dep kútilýde.
Sondaı-aq 168 nysannyń qurylys-jóndeý jumystaryna qajetti 45,9 mıllıard teńge bólingen. Tıisti jumystar aldaǵy ýaqytta da jalǵasyn tabatyn bolady.
Jambyl oblysy