Keshe «Habar 24» telearnasynyń tikeleı efıri arqyly onlaın brıfıng ótkizgen Aqparat jáne qoǵamdyq damý mınıstri Dáýren Abaev Tótenshe jaǵdaı rejimin qamtamasyz etý jónindegi memlekettik komıssııanyń sheshimderi týraly habarlady.
Memleket basshysy Qasym-Jomart Toqaevtyń málimdemesi – eldiń, halyqtyń amandyǵy úshin jasalǵan kúrdeli, biraq asa qajet sheshim ekenin aıtqan mınıstr karantınniń nátıjesinde elimizde indet jappaı taralmaǵanyn atap ótti. «Biraq, Prezıdent aıtqandaı, bosańsýǵa áli erte. Qasym-Jomart Kemeluly Memlekettik komıssııaǵa birqatar ekonomıka salalarynyń jumysyn qaıta qalpyna keltirýdi tapsyrdy. Iаǵnı biz neǵurlym karantın talaptaryn qatań saqtasaq, soǵurlym kúndelikti tirshilikke tezirek qaıta oralamyz. Bul, ásirese, mamyr aıyndaǵy mereke kúnderi jáne qasıetti Ramazan aıynda óte ózekti. О́zderińiz bilesizder, Ramazan aıy – eń aldymen, izgi amaldardyń, saýapty isterdiń aıy. Bul turǵyda, elimizdegi «Biz birgemiz!» aksııasynyń da basty maqsaty jaqsylyqpen, izgilikpen úndesedi», dedi D.Abaev.
Keshe Prezıdenttiń tapsyrmalaryn oryndaý maqsatynda ótken Tótenshe jaǵdaı rejimin qamtamasyz etý jónindegi memlekettik komıssııanyń otyrysyna toqtalǵan Dáýren Abaev basty mindettiń biri test arqyly anyqtaý jumystarynyń kólemin arttyrý ekenin jetkizdi. Onyń aıtýynsha, sáýir aıynda anyqtalǵan aýrý jaǵdaılarynyń 67%-y sımptomsyz bolǵan. Bul profılaktıkalyq dıagnostıka arqyly anyqtalyp otyr. Sondaı-aq medısına qyzmetkerlerin de test arqyly tekserip otyrýdyń mańyzdylyǵyn atap ótken mınıstr elimizde 20 myńnan asa medısınalyq qyzmetker test arqyly tekserilgenin jetkizdi.
Komıssııa otyrysynda Nur-Sultan men Almaty qalalary arasyndaǵy áýe baılanysy 1 mamyrdan bastap birtindep qalpyna keletini týraly sheshim qabyldandy. Sheshimge saı birinshi kezeńde kúnine 4 reıs jasaý josparlanǵan. D.Abaevtyń habarlaýynsha, 2 reıs – Air Astana, 1 reıs – Fly Arystan, 1 reıs – SCAT kompanııalaryna tıesili. «Olar bılet qunyn karantınge deıingi deńgeıde ustaýǵa mindetti. Al jaǵdaı túzelgen saıyn reıs sanyn jáne ushaq syıymdylyǵyn arttyrý máselesi qarastyrylady. Áýe tasymaly kóliktegi Bas sanıtarlyq dáriger bekitken kúsheıtilgen sanıtarlyq talaptar arqyly jasalady», dedi vedomstvo basshysy.
Mınıstr Komıssııa otyrysynda barlyq óńirlerde búginnen, al Shymkent qalasynda bıylǵy 1 mamyrdan bastap qatań sanıtarlyq-epıdemııalyq talaptardy saqtaýmen jumysqa kirisetin kásipkerlik sýbektileri qyzmet túrleriniń tizimi bekitilgenin de atap ótti.
Aqparat jáne qoǵamdyq damý mınıstri qazir shetelde Qazaqstannyń 175 myń azamaty bar ekenin, olardyń kópshiligi Otanyna oralǵysy keletinin aıta kelip, Syrtqy ister mınıstrligi osy baǵytta úlken jumys júrgizip jatqanyn aıtty. «AQSh-tan – 179, Polshadan – 65, Izraılden 28 azamatymyzdy ákelemiz. Al Reseıden mamyr aıynda 6 myńnan asa azamatymyzdy elge jetkizý josparlanýda», dedi ol.
Mınıstr elimizde bıznes ókilderin, ásirese eksportqa baǵyttalǵan kásiporyndardy qoldaýǵa baǵyttalǵan QAZTRADE baǵdarlamasy iske qosylǵanyn da habarlady. Al tótenshe jaǵdaı kezindegi qylmystyń aldyn alý jumystaryna toqtalǵan D.Abaev 16 naýryzdan bastap tótenshe jaǵdaı erejesin buzǵan 16 myńnan astam azamat ustalǵanyn, onyń 12 myńnan astamy ákimshilik jaýapkershilikke tartylǵanyn jetkizdi. «Densaýlyq saqtaý organdarynyń suraýy boıynsha polısııa alty jarym myńnan astam adamnyń turatyn jerin anyqtady. Qazirgi ýaqytta izdeý jumystary tek 7 adamǵa júrgizilýde», dedi ol.