Memleket basshysy Qasym-Jomart Toqaevtyń elimizdegi tótenshe jaǵdaıdyń uzartylýyna qatysty jasaǵan málimdemesi asa qajetti shara dep bilemin. Jahandy ábigerge salǵan pandemııanyń elimizde órship ketpeýi eń aldymen osy tótenshe jaǵdaı rejiminiń ýaqtyly engizilýimen tikeleı baılanysty.
Búginde koronavırýs indetine shaldyqqandar sany dúnıe júzinde 3 mln-ǵa jýyqtady. Medısınasy damyǵan el dep baǵalanatyn AQSh, Eýropa elderiniń jaǵdaıy da máz emes. Al Qazaqstandaǵy jaǵdaı álem memleketterimen salystyrǵanda barynsha turaqty. Alaıda elimizde vırýs juqtyrǵandar sany artyp keledi. Biraq indet juqtyrý dınamıkasy áldeqaıda tómen. Sondyqtan Prezıdent tarapynan qabyldanyp jatqan sharanyń barlyǵy da durys der edim. Tótenshe jaǵdaı merzimin sozýymyz qajet. Nege? Sebebi tótenshe jaǵdaı merzimin uzartqan saıyn elimizde aýrýǵa shaldyqqandardyń sany azaıady.
Tótenshe jaǵdaı rejimin eń aldymen aýyldyq, aýdandyq deńgeıde qatańdatý qajet dep sanaımyn. Olaı deýge sebep – vırýstyń Qazaqstannyń aımaqtaryna taralyp ketýinde bolyp otyr. Osy máselege qatań nazar aýdarý kerek dep bilemin.
Memleket basshysy atap ótkendeı, 12 mamyrdan bastap tótenshe jaǵdaı rejimi toqtatylady. Biraq bir nársege qazirden bastap úırenýimiz kerek. Koronavırýsqa vaksına tabylǵansha bizge osy indetpen qatar ómir súrýimizge týra keledi. Bul asa qaýipti másele. Alaıda qoldan keler odan ózge qaıran joq. Sondyqtan adamdar sanıtarlyq-gıgıenalyq normalardy saqtaýdy jáne turǵyndar arasyndaǵy qarym-qatynas mádenıetin ózgertýdi, sonymen qatar jeke basynyń, qorshaǵan ortanyń qaýipsizdigin saqtaýdy úırenýi tıis. Sol kezde baryp elimizde vırýs juqtyrǵandar sany azaıady.
Tótenshe jaǵdaı rejimi kezinde memleket tarapy da halyqqa beıjaı qaraǵan joq. Otandastarymyzǵa tıisti kómek kórsetilip jatyr. Prezıdent málimdemesinde atap ótkendeı, halyqqa kómektesý, ıaǵnı azamattar men bıznesti qoldaý úshin 6 trln teńgege jýyq qarjy bólindi. Bul – halyqqa asa úlken kómek. Máselen, kórshiles Reseı, О́zbekstan syndy memleketterdiń birde-bireýi óz halqyna osyndaı qoldaý jasap jatqan joq. Sondaı-aq elimizdegi tótenshe jaǵdaı rejiminiń sozylýynyń ózi halyqtyń densaýlyǵyn saqtaýǵa degen memlekettiń kóńili deýge bolady. Osyny este saqtaýymyz kerek.
Qazirgi eń negizgi másele – otandastarymyzdyń tótenshe jaǵdaı rejimi kezinde de, tótenshe jaǵdaı rejimi aıaqtalǵan soń da tártipti saqtaı bilýinde. О́z mádenıetimizdi ózgertýimiz qajet. Sondyqtan elimizde qabyldanyp jatqan is-sharanyń barlyǵy da turǵyndar úshin aýadaı qajet ári durys dep bilemin.
Erlan SAIROV,
saıasattanýshy