Nur Otan partııasy Qaraǵandy oblystyq fılıaly tóraǵasynyń birinshi orynbasary Qadısha Ospanova Birgemiz aksııasy aıasynda óńir turǵyndaryna qandaı kómek kórsetiletinin málim etti. Mysaly, qazirdiń ózinde oblystyń úsh qalasynda 13 myńnan astam adam 50 myń teńgeden bir rettik kómek alǵan. Endi, áleýmettik jaǵynan osal 18 myń adam mamyr aıynda dál osyndaı kómek alatyn bolady.
Birgemiz qorynyń Qamqorshylyq keńesi elimizdegi 23 qalanyń 150 myńnan astam turǵynyna kómek kórsetý týraly sheshim qabyldaǵany belgili. Qaraǵandy oblysynda mundaı baqytqa Qaraǵandy, Temirtaý jáne Jezqazǵan qalalary ıe bolǵan edi.
Qadısha Ospanova búgingi kúnde oblysta atalǵan qordyń Birgemiz-Qaragandy dep atalatyn fılıaly ashylǵanyn atap ótti. Oǵan joǵaryda atalǵan úsh qalada turatyn tabysy óte tómen adamdardy qoldaý úshin respýblıkalyq qordan aqsha túsedi. Kómekti úlestirý úshin qala ákimderi men áleýmettik qorǵaý organdary qoldaýǵa muqtaj adamdardyń tizimin berýi kerek.
«Sáýir aıynyń 9-16 kúnderi aralyǵynda birinshi transhpen Qaraǵandy oblysynyń úsh qalasynyń turǵyndaryna 50 myń teńgeden aýdaryldy. Halyqtyń áleýmettik osal toptarynyń sanatyna kiretin 13 674 adamǵa (kóp balaly, I toptaǵy múgedekter, múgedek balany kútýshi tulǵalar, jasyna baılanysty zeınetkerler, eń tómengi zeınetaqy alatyn, jetim balalar, jáne asyraýshysynyń birinen aıyrylǵan balalar, UOS qatysýshylary jáne olarǵa teńestirilgen tulǵalar, tyl eńbekkerleri) jalpy somasy 683 mln 700 myń teńgege kómek kórsetildi», dedi Qadısha Ospanova.
Materıaldyq kómek ekinshi deńgeıdegi bankter arqyly jeke adamnyń kartochkalyq nemese aǵymdaǵy shotyna aýdarylady. Mundaı qoldaý kásipker-mesenattardyń kómeginiń arqasynda múmkin boldy.
Qadısha Ospanova mamyr aıynyń basynda júzege asatyn ekinshi transhpen Qaraǵandy, Temirtaý jáne Jezqazǵan qalasynan 18 383 adamdy qamtý josparlanǵanyn atap ótti.
Sondaı-aq, #Bizbirgemiz #NurOtan qaıyrymdylyq aksııasy aıasynda 19 naýryzdan 26 sáýirge deıin Qaraǵandy oblysynda Jas Otan jáne Saryarqa jastary eriktiler brıgadalarynyń kúshimen 5 100 muqtaj otbasyna (kóp balaly jáne tolyq emes otbasylar, múmkindigi shekteýli jandar, ardagerler, tyl eńbekkerleri, jetim balalar) 65 mln teńgege kómek kórsetilgen. Olar antıseptıkalyq quraldarmen, medısınalyq maskalarmen jáne birinshi qajettilik ónimderimen qamtamasyz etilipti.
Oblystyq shtabtyń árbir eriktisi kún saıyn orta eseppen 10-12 mekenjaıdy aralap shyǵady eken jáne olar demalyssyz jumys isteıtin kórinedi.
Sonymen qatar kásipkerler, partııanyń belsendi músheleri áleýmettik jaǵynan osal azamattarǵa 36 tonna kartop, 16 tonna un, 5 tonna et, 1000 taýyq eti, kókónis pen jemis-jıdekter úlestiripti. Partııalyqtar kóp ret qoldanylatyn maskalardy tigýdi uıymdastyryp, 10 myńnan astam jeke tańǵyshtar taratqan.
Nur Otan partııasy Qaraǵandy oblystyq fılıaly tóraǵasynyń birinshi orynbasary Qadısha Ospanova qazirgi tańda jumystyń qyzyp turǵanyn aıtady. Fılıaldyń qoǵamdyq qabyldaý bólmesine jáne resmı akkaýnttaryna kún saıyn 150 ótinish kelip túsedi eken.
«Qaraǵandyda 1 sáýirden bastap 85 jastan asqan 49 jalǵyz basty jáne asa muqtaj zeınetker úshin kún saıyn ystyq tamaq daıyndaý jáne jetkizý uıymdastyrylǵan. Bul kómek karantın aıaqtalǵanǵa deıin jalǵasady», deıdi Qadısha Ospanova.
Qaraǵandy oblysy